Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 277 Hüküm no: 439 Orijinal metin no: [41a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti Hâtun bt. Emirşah’ın, çiftliğini Sefer Ağa’ya sattığı Fahrü’l-muhadderât tâcü’l-mestûrât Sitti Hâtun bt. Emirşah tarafından ikrâr-ı âti’z-zikre Ahmed Çelebi b. Mustafa ve Hamza b. el-Hâc Lütfullah şehâdetleriyle sâbitü’l-vekâle olan kıdvetü’l-müderrisîni’l-kirâm Zekeriya Efendi b. Kasım nâm kimesne mahfil-i kazâda bâ‘isü’l-kitâb kıdvetü’l-emâcid ve’l-efâhim müstecmi‘u’l-meâlî ve’l-e‘âzım hâlâ kapucıbaşı olan Sefer Ağa tarafından tasdîk-i âti’z-zikre şâhidân-ı mezbûrân şehâdetleriyle sâbitü’l-vekâle olan hâssa çaşnigirlerinden fahrü’l-emâcid ve’l-â‘yân zahrü’l-ekābir ve’l-akrân Mahmud Ağa b. İshak mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp müvekkilem mezbûre Sitti Hâtun mahrûse-i mezbûre muzâfâtından kasaba-i Gekvize kurbunda vâki‘ iki tarafı tarîk-i âm ve bir tarafı Darıca demekle ma‘rûf olan karye ile ve bir tarafı Filingiri demekle ma‘rûf olan karye ile mahdûd ve mümtâz olan on dört bâb evleri ve iki kıt‘a bağları ve bir kıt‘a bahçeyi ve bir ayn-ı cârî ve altı âdet kara sığır öküzü ve elli âdet kara sığır dahi ki tosun demekle ma‘rûfdur ve üç âdet kara sığır dahi ki düğe demekle ma‘rûfdur ve üç âdet kara sığır inek ve kırk âdet kovanı ve mülk ıtlâk olunan hırdavâtı müştemil olan Akpınar Çiftliği demekle ma‘rûf çiftliği müşârunileyh Sefer Ağa’ya seksen bin nakd râyic fi’l-vakt akçeye bey‘ edip meblağ-ı mezbûru bi’t-tamâm alıp kabz ettikden sonra zikr olunan çiftliğe tâbi‘ olup inde’l-ahâlî ve’l-cîrân ma‘lûmü’l-hudûd olan mezâri‘in cemî‘ tevâbi‘ ve levâhıkıyla ve merâsîm ve merâfıkıyla hakk-ı tasarrufunu sâhib-i arz ma‘rifeti ile yine mûmâileyh Sefer Ağa’ya tefvîz edip mukābele-i tefvîzde yirmi beş bin akçeye dahi bi’t-tamâm ve’l-kemâl alıp kabz eyledi keyfe mâ yeşâ mutasarrıf olsun dedikde mukırr-ı mezbûrun vech-i meşrûh üzre vâki‘ olan ikrârını vekîl-i müşârunileyh Mahmud Ağa vicâhen ve şifâhen tasdîk ve tahkīk ettikden sonra sûret-i hâl tahrîr olundu. Fî evâili Ramazân sene elf. Şuhûdü’l-hâl: Kıdvetü’l-emâcid Sinan Ağa ed-Devâtiyyi’s-sultânî, Mehmed Çelebi el-cündî, Bekir b. Nasûh, Hacı Mustafa, Mirzâ Halîfe b. Mehmed el-imâm, Muttalib b. Süleyman, Mehmed Yayabaşı b. Ahmed Bey, Gazanfer Bey b. Sefer, İskender Bey Kapıcı, Hamza b. ( ), Kaya Çelebi b. İskender es-Sarrâcü’s-sultânî ve gayruhüm Yevmü’l-ahad fî 4 Ramazâni’l-mübârek sene elf