Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 283 Hüküm no: 450 Orijinal metin no: [42b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mesih b. Abdullah’ın malının üçte birini hayır için vasiyet ettiği Fahrü’l-hutebâ Mevlânâ Murad Halîfe b. Abdülmüste‘ân mahfil-i kazâda mahrûse-i Üsküdar’da beytülmâl emîni olan Müstedâm Bey b. Abdülmüste‘ân mahzarında da‘vâ kılıp bundan akdem fevt olup vâris-i ma‘rûfu olmamağla metrûkâtı beytülmâle âid olan Mesih b. Abdullah hâl-i hayâtında ve mefâd-ı tasarrufâtında beni vasîyy-i muhtâr edip cümle rızkımdan sülüs mâlım vasiyyetim olup vücûh-ı hayrâta sarf eyle deyu cümle metrûkâtını mezbûr Müstedâm Bey kabz eyledi hâlâ sülüs-i mâlın taleb eylerim dedikde mezbûr Müstedâm Bey cevâb verip beyân eyle dedikde udûl-i müslimînden ve sıkāt-ı muvahhidînden Mustafa b. Kara Hüseyin ve el-Hâc Mustafa b. Ali nâm kimesneler li ecli’ş-şehâde şâhidân olup fi’l-vâki‘ müteveffâ-yı mezbûr hâl-i hayâtında ve kemâl-i sıhhatinde mezbûr Murad Halîfe’yi vasîyy-i muhtâr edip ve sülüs mâlım vücûh-ı hayrâta sarf oluna deyu vasiyyet eyledi biz bu husûsa şâhidleriz şehâdet dahi eyleriz dediklerinde şâhidân-ı mezbûrânın şehâdetleri hayyiz-i kabûlde vâki‘ oldukdan sonra ta‘dîl üzre verilip ve meblağ-ı mezbûrun sülüsü vasîyy-i muhtâra teslîme hükm olunduğu kayd olundu. Şuhûdü’l-hâl: es-Sâbikūn