Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 284 Hüküm no: 451 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmügülsüm bt. Hasan’ın, evini Osman b. Mahmud’a sattığı Kefçe mahallesi sâkinelerinden Ümmügülsüm bt. Hasan nâm hâtun tarafından ikrâr-ı âtîyi tasdîka Abdülvehhâb b. Mehmed ve Hızır b. Mehmed şehâdetleriyle vekâleti sâbite olan Osman b. Mahmud nâm kimesne mahfil-i kazâda işbu fahrü’l-akrân İbrahim Bey b. Mehmed nâm kimesne mahzarında ikrâr ve takrîr-i merâm kılıp mezbûre Ümmügülsüm’ün Ahmed Çelebi mahallesi dâhilinde Topçu Mustafa b. İyaz ve Ali Çelebi b. ( ) ve bir cânibi Sinan Subaşı b. Abdullah nâm kimesneler mülkleriyle ve tarîk-i âmla mahdûd olup bir çatma yer evini önünde bir sundurmayı ahırı ve bahçeciği ve müsterâhı ve cümle tevâbi‘ ve levâhıkıyla dokuz bin nakid akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ kıldım dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-mezbûr bi’l-muvâcehe tasdîk eylediği kayd şud. Şuhûdü’l-hâl: Ahmed b. Abdullah, Hasan b. İskender, Mehmed b. Süleyman, Ali b. Abdullah, Ahmed b. Hasan, Hüseyin Çelebi b. Veli, Mehmed b. Behrâm Yevmü’l-hamîs fî 8 Ramazâni’l-mübârek sene elf