Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 287 Hüküm no: 462 Orijinal metin no: [43b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hüseyin b. Abdurrahim’in, evini Ümmügülsüm bt. Hasan’a sattığı Budur ki Hacı Hüseyin b. Abdurrahim mahfil-i kazâda bâ‘isü’l-hurûf Ümmügülsüm bt. Hasan nâm hâtun tarafından tasdîk-i âti’z-zikre vekîl-i şer‘î olan Hacı Davud b. Hasan nâm kimesne mahzarında ikrâr ve takrîr-i kelâm edip mahalle-i Ahmed Çelebi’de vâki‘ bir cânibi Musli b. Ayas mülkü ile bir cânibi Korucu Ali Bey eviyle ve bir cânibi Şems Hâtun eviyle ve tarîk-i hâs ile mahdûd olan bir bâb tahtânî evi havlusuyla ve bahçesiyle cemî‘ tevâbi‘ ve levâhıkıyla mezbûreye dokuz bin nakd râyic fi’l-vakt akçeye bey‘-i bât ile bey‘ edip teslîm-i mebî‘ ve kabz-ı semen kıldım dedikde mukırr-ı mezbûrun vech-i meşrûh üzre vâki‘ olan ikrârını vekîl-i mezbûr vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fî evâsıtı şehri Ramazâni’l-mübârek sene elf. Şuhûdü’l-hâl: El-Hâc Murad Halîfe el-hatîb, Hüseyin Bey b. Celal, Osman Bey b. Mahmud, Muttalib b. Süleyman ve gayruhüm