Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 427 Hüküm no: 782 Orijinal metin no: [74b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın, ölen Ferruh’un kardeşi olduğu Mustafa b. Abdullah nâm kimesne mahfil-i kazâda Üsküdar’da hâlâ subaşı olan fahrü’l-akrân Müstedâm Bey b. Abdullah mahzarında takrîr-i da‘vâ kılıp karındaşım Ferruh fevt olup vekâletini mezbûr Müstedâm Bey kabz eylemişdir müteveffâ-yı mezbûrun verâseti bana münhasıradır şer‘le taleb eylerim dedikde gıbbe’s-suâl ve akībe’l-inkâr müdde‘î-i mezbûrun da‘vâsına muvâfık beyyine taleb olundukda udûl-i müslimînden ve sikāt-ı muvahhidînden Hamza Bey b. Abdullah ve İbrahim b. Durmuş ve Süleyman Bey er-râcil ve Ahmed Bey b. Şeyh Mehmed nâmlar meclis-i şer‘a li ecli’ş-şehâdet hâzırûn olup şehâdet-i şer‘iyye kılıp fi’l-vâki‘ müteveffâ-yı mezbûr Ferruh’un müdde‘î-i mezbûr Mustafa li eb ve üm karındaşıdır biz bu husûsa şâhidleriz şehâdet ederiz dediklerinde şehâdetleri hayyiz-i kabûlde vâki‘ olduğu bi’t-taleb kayd şud. Şuhûdü’l-hâl: Mehmed b. Behrâm, Mustafa b. Mehmed, Hasan b. Sâdık ve gayruhüm Yevmü’l-Cum‘a fî 19 Zilhicceti’ş-şerîfe sene elf