Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 429 Hüküm no: 787 Orijinal metin no: [75a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Rahmetî b. İsa’nın yerinin, tapu resmiyle annesi Sabire bt. Kara İlyas’a verilmesi Mahrûse-i Üsküdar muzâfâtından merhûm Sultan Selîm Hân -tâbe serâhu- hazretlerinin evkāfından Tavşancıl nâm karyenin câbisi olan Mahmud Sofu mahfil-i kazâda ve karye-i mezbûreden Sabire bt. Kara İlyas nâm hâtun mahzarında ikrâr edip bundan akdem mezbûre Sabire’nin oğlu Rahmeti b. İsa nâm kimesne vefât edip evlâdı kalmamağın tasarrufunda olan altı akçe kulluklu yeri kānûn-ı pâdişâhî üzre tapuya müstahak olup İlyas ve Pîr Bâli nâm kimesnelerin bin akçe resm-i tapuların alıp vermiş idim hâlâ mezbûre Sabire tâlibe olmağın hâric verdiği bin akçe resm-i tapuyu mezbûreden bi’t-tamâm alıp kabz edip zikr olunan altı akçe kulluk yeri verdim zirâ‘at ve hirâset edip vakfa öşrün edâ ettikden sonra tasarrufuna kimesne mâni‘ olmaya dedikde mukırr-ı mezbûrun vech-i meşrûh üzre vâki‘ olan ikrârını mezbûre Sabire vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Hüsrev Bey er-râcil, Mustafa b. Abdullah, Mehmed b. Behrâm ve gayruhüm Yevmü’s-sebt 20 Zilhicceti’ş-şerîfe sene elf