Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 430 Hüküm no: 790 Orijinal metin no: [75a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Nasûh’un, evini eşi Ayşe bt. Hoca Hayreddin’e sattığı (…) el-Hâc Ramazan b. Nasûh mahfil-i kazâda zevcesi Ayşe bt. Hoca Hayreddin mahzarında ikrâr edip Selman Ağa mahallesinde vâki‘ bir tarafı Abacı Osman mülkü ile bir tarafı Mustafa mülkü ile ve bir tarafı Kapıcı Mustafa mülkü ile ve bir tarafı tarîk-i âm ile mahdûd olan iki bâb tahtânî ve bir bâb fevkānî evi ve bahçeyi ve kenîfi müştemil olan mülk menzilimi cemî‘ tevâbi‘ ve levâhıkıyla mezbûre Ayşe’ye on altı bin beş yüz nakd râyic fi’l-vakt akçeye bey‘ edip teslîm-i mebî‘ ve kabz-ı semen kıldım dedikde mukırr-ı mezbûrun vech-i meşrûh üzre vâki‘ olan ikrârını mukarrun leha’l-merkūme vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Şuhûdü’l-hâl: Ali Halîfe b. Mahmud el-imâm, Mehmed b. Behrâm, Muttalib b. Süleyman