Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 430 Hüküm no: 791 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İrini bt. Yani’nin, mahzenlerini Todori v. Dimitri ve eşine sattığı Budur ki Mahrûse-i Üsküdar muzâfâtından Kadıköyü nâm karye sâkinelerinden Sevasti bt. Yorgi nâm zimmîye mahfil-i kazâda karye-i mezbûreden İrini bt. Yani nâm zimmîye tarafından tasdîk-i âti’z-zikre vekîl olup vekâleti nehc-i şer‘î üzre sâbite olan zevci Todori v. Dimitri mahzarında ikrâr ve takrîr-i kelâm edip karye-i mezbûrede vâki‘ bir tarafı deryâ ve üç tarafı tarîk-i âm ile mahdûd ve mümtâz olan iki bâb mahzenimi tevâbi‘iyle mezbûrâna ber vech-i iştirâk on altı bin nakd râyic fi’l-vakt akçeye bey‘ edip teslîm-i mebî‘ ve semen-i mezbûrdan sekiz bin akçeyi mezbûre yedinden ve sekiz bin akçeyi zevci Todori yedinden bi’t-tamâm alıp kabz eyledim ba‘de’l-yevm varıp tasarruf etsinler dedikde mezbûrenin zevci Yani v. İstemad nâm zimmî dahi zikr olunan mahzen mezbûrenindir benim kat‘â medhalim yokdur dedikden sonra mezbûr Todori vicâhen tasdîk ettikden sonra mâ vaka‘a bi’t-taleb tahrîr olundu. Şuhûdü’l-hâl: Mehmed b. Ramazan el-imâm, Musa b. Pîr Veli, Ramazan b. Mehmed, Mehmed b. Hasan, Cafer b. Ali, Hızır b. Cafer, Ahmed b. Cafer, Hasan b. İlyas, Mehmed b. Yakub, Bâli Bey sarrâc-ı hâssa, Andriye [v.] Todori, Dimitri [v.] Todora, Mihal [v.] Kosta, Matyoz v. Yani, Tolfoz [v.] Talandi, Manol [v.] Yorgi, Demotyoz Metropolid ve gayruhüm