Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 433 Hüküm no: 798 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan bt. Solak Bâli’nin, Ali b. Hüseyin’e rehin verdiği evin Mehmed Usta b. Abdülmennân’a satıldığı Mahrûse-i Üsküdar’da Kefçe mahallesi sâkinelerinden Sultan bt. Solak Bâli nâm hâtun mahfil-i kazâda fahrü’l-akrân hâssa bahçe ustalarından Mehmed Usta b. Abdülmennân mahzarında ikrâr ve takrîr-i merâm kılıp mahalle-i mezbûrede Uzun oğlu b. Mustafa ve Emine bt. Mustafa ve Hüseyin b. Karaoğlan mülkleriyle ve tarîk-i âmla mahdûd olup tahtânî ve fevkānî iki bâb evi ve bir ahırı ve bahçeyi ve müsterâhı müştemil olan mülk menzilimi bundan akdem müşârunileyh Mehmed Usta’ya bey‘-i bi’l-vefâ ile vermişdim yine ondan mukaddem Fenârî merhûm Mehmed Efendi evkāfına mütevellî olan Ali b. Hüseyin nâm kimesneye rehin vaz‘ eylemişdim hâlâ mütevellî-yi mezbûr ma‘rifetiyle Mehmed Usta’ya on iki bin nakid akçeye bey‘-i bâtt-ı sahîh-i şer‘î birle bey‘ edip kabz-ı semen ve teslîm-i mebî‘ kıldım dedikde mütevellî-yi mezbûr Ali dahi meclis-i şer‘de bey‘-i merkūma ben dahi râzı oldum deyu izin verdikden sonra mukırra-i mezbûrenin vech-i meşrûh üzre vâki‘ olan ikrârını mukarrun lehâ mûmâileyh bi’l-muvâcehe tasdîk eylediği kayd olundu. Şuhûdü’l-hâl: Mehmed Subaşı, Fahrü’l-akrân Hamza Subaşı, Müstedâm Bey b. Abdurrahman, Süleyman b. Budak ve gayruhüm