Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 273 Hüküm no: 560 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terkos Mukataası mültezimleri Süleyman b. Şemayil ile Yasef b. Mosi’ye, 18.913 akçe mukataa mahsulünü âmili Mosi b. Sahak’a vermeleri için bir yıl süre verildiği Süleyman b. Şemayil ile Yasef b. Mosi nâm kimesneleri Mosi b. Sahak mahfil-i şer‘a getirip üzerlerine takrîr-i da‘vâ kılıp dedi ki ben Terkos Mukāta‘ası’na âmil olup mezbûrân Süleyman ile Yasef kefîllerim olmağın mukāta‘ayı bunlara verip bir yıl tamâm dokuz yüz altmış altı senesinin mahsûlünü zabt edip bâkī yevmiyyeler bâkī kalır ise yanlarından vermeğe mukır olmuşlar idi, şimdi on sekiz bin dokuz yüz on üç akçe bâkī kaldığı vardır bunlardan taleb ederim, deyip mezbûrân Süleyman ile Yasef’e suâl olundukda vâkı‘ada bir yıl Terkos Mukāta‘asını biz zabt eylemeden on sekiz bin dokuz yüz on üç akçe bâkīmiz kaldı biz cem‘ edelim etmeyelim bir mikdâr zaman versin biz verelim bâkīdir biz cem‘ etdirir meblağ-ı mezbûru bizden alsın vâcibü’l-edâ deynimizdir deyip târih-i kitâbdan bir yıla varınca meblağ-ı mezbûra mesfûr Mosi mezbûrân Süleyman ile Yasef’e mehil verip mültezimân? edâ-i deyn ile iltizâm edip mâ cerâ bi’t-taleb kayd olundu. Tahrîren fî evâhiri Saferi’l-muzaffer li-sene tis‘a ve sittîn ve tis‘a mi’e. Şuhûd: Ferruh b. Abdullah, Mehmed b. Mustafa, Ramazan b. Mahmud, Veli b. Mahmud, Hasan b. Yunus, Süleyman b. Hüseyin gayruhüm.