Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 273 Hüküm no: 561 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akıntıburnu köyünden Petro ve Yani’nin mirasları hususunda vârislerinin birbirlerinin zimmetlerini ibrâ ettikleri Yevmü’s-sülâsâ, fî 19 Sebeb-i tahrîr-i hurûf budur ki Akındı[burnu] nâm karyeden bundan akdem Petro nâm Nasrânî fevt olup sulbî oğullarından Kosta ve Todora ve Yani[‘yi] terk edip müteveffâ-yı mezbûrun muhallefâtından bazı muhallefâtı beyne’l-verese kısmet olunup karye-i mezbûrede iki tahtânî evi içinde at değirmeni ve buzhânesi ve fırını ve bir kıt‘a bahçesi ile mezkûr vârisler müşâ‘ [u] müşterek zabt [u] tasarruflar iken kable kısmet Yani-i mezkûr dahi fevt olup Andreya ve Manol ve Hafir nâm sagīreleri terk edip zevcesi Tarandaklidi bt. Yani[‘yi] terk etdikde mezkûr vârisler talebiyle ve ehl-i vukūfdan ve muhammin[în]den bazı kimesneler ile üzerine varıldıkda fırın değirmenli ve kırk dört zirâ‘ tûlu ve on sekiz zirâ‘ arzı [olan] bahçeden mezbûr sagīrlere, zevcesine hisse ta‘yîn olundukda hudûd-ı erba‘ası; bir tarafı dere ve bir tarafı tarîk-i âm ve bir tarafı Kosta-i mezbûra muttasıl bir tarafı Dimitri b. Pavlo [ile] mahdûd olup ve buzhâne; -kayd olundu- sonra manastırın buzhâne kapısı, iki kayık, bir anbar, fırın köşesinden tarîk-i âmme varınca duvarıyla ve bahçeden kırk dört zirâ‘ tûlu ve on sekiz [zirâ‘] arzı olan hisse Kosta’ya ta‘yîn olundukda bir tarafı tarîk-i âm bir tarafı sagīrelere ta‘yîn olunan hisseye muttasıl ve bir tarafı Todora’ya muttasıl bir tarafı Dimitri b. Pavlo’ya muttasıl [ve] mahdûd olup bahçeden altmış altı zirâ‘ tûlu yirmi dört zirâ‘ arzı olup bir tarafı tarîk-i âm ve bir tarafı mezbûr Kosta’ya muttasıl bir tarafı yine kendi mülküne muttasıl bir tarafı Anekli’nin mülküne [muttasıl] olan hisse mezbûr Todora’ya ta‘yîn olunup min ba‘d mâbeynlerinde irse müte‘allik da‘vâ ve husûmet olmadığı bi’t-taleb kayd olundu. Tahrîren fî evâsıtı Zilhicce li-sene seb‘a ve sittîn ve tis‘a mi’e. Şuhûd: Fahrü’l-akrân Mustafa Çavuş, Sadi Subaşı [b.] Yusuf, Ali Reis b. Abdullah, Ramazan b. Mahmud, Ahmed b. Abdullah, Mehmed b. Mustafa el-muhzır, Papas Dimitri b. Yani, Yorgi Kethüdâ [b.] Lazari, Luz b. Yani, Dode b. Diçko, Arslan b. ( ), Atnas b. Pavlo, Andreya b. Horos, Duka b. Andreya ve gayruhüm mine’l-hâzırîn.