Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 222 Hüküm no: 276 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali’nin “borcumu ödersem karım benden üç talak ile boş olsun” şeklindeki ifadesinde; şartını yerine getirmediği takdirde nikâhına bir zarar gelmeyeceği Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesinden Belkıs bt. Abdullah nâm hatun meclis-i şer‘-i hatîr-i lâzımü’t-tevkīrde zevci işbu sâhibü’l-kitâb Ali b. Abdurrahman nâm kimesne mahzarında üzerine da‘vâ ve takrîr-i kelâm edüp zevcim mezbûr Ali târih-i kitâbdan iki gün mukaddem kasaba-i mersûme sükkânından gāib ani’l-meclis Hacı Çingene demekle ma‘rûf kimesnenin abd-i memlûkü Yusuf b. Abdullah nâm gulâma zimmetinde olan yirmi beş akçe deyni için eğer meblağ-ı mezbûru sana edâ edersem avretim benden talâk-ı selâse ile mutallaka olsun deyü vech-i muharrer üzere tahkīkini îkā‘a ta‘lîk-i şart eyleyüp ve dahi meblağ-ı mezbûru mezbûr Yusuf’a edâ ve teslîm etmemişdir lâkin bana husûs-ı mezbûrda şübhe îrâs etmekle beynimiz tefrîk olunmasın taleb ederim dedikde gıbbe’l-istintâk ber-vech-i meşrûh meblağ-ı mezbûru merkūm Yusuf’a edâ etmesine ta‘lîk-i şart eyledim deyü i‘tirâf eyleyüp meblağ-ı mersûmu edâ eyledim deyü merkūmeyi tasdîk edicek mezbûr Ali tahkīkini vukū‘a getirmedikçe zevcesi merkūme Belkıs’ın mezbûrdan mutallaka olmadığı kütüb-i fıkhiyyede mastûr ve mukayyed bulunmağın mezbûra ba‘de’t-tenbîh mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilka‘deti’ş-şerîfe li-seneti’l-mezbûre. Şühûdü’l-hâl: Ahmed b. Hasan, Receb b. Hasan, Mustafa b. Ali ve gayruhüm.