Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 223 Hüküm no: 278 Orijinal metin no: [82b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Ali’nin miras hususunda İbrahim Çelebi aleyhine açtığı davada iddiasını ispat edemediği Mahmiye-i Galata muzâfâtından kasaba-i Beşiktaş mahallâtından Sinanpaşa mahallesi sâkinelerinden iken bundan akdem müteveffât olan Âişe bt. ( ) nâm hatunun li-ebeveyn er karındaşı oğlu ve hasren vârisi olan Mustafa Çelebi b. Ali nâm kimesne meclis-i şer‘-i hatîr-i lâzımü’t-tevkīrde müteveffât-ı mezbûrenin sadriye kızı oğlu işbu râfi‘atü’l-kitâb İbrahim Çelebi b. Merdan Bey mahzarında üzerine da‘vâ ve takrîr-i kelâm edüp mezbûr İbrahim Çelebi müteveffât-ı mezbûrenin verâseti kendüye münhasıra olmak zu‘muyla terekesinden iki Selanik keçesi ve iki orta keçesi ve bir kilim ve beş tencere ve bir sahan ahz u kabz etmeğin hâlâ eşyâ-i mersûmeyi verâsetim hasebiyle mezbûr İbrahim Çelebi’den taleb ederim suâl olunsun dedikde gıbbe’s-suâl ve’l-inkâr mezbûr Mustafa Çelebi’den da‘vâsına mutâbık beyyine taleb olundukda ityân-ı beyyineden izhâr-ı acz edüp istihlâf etmeğin mezbûra ber-vech-i muharrer müteveffât-ı merkūmenin muhallefâtından eşyâ-i mersûmeyi ve sâir kalîl ve kesîr esâs-ı beyti kabz eylemediğine yemin teklîf olundukda ol dahi alâ-vefkı’l-mes’ûl yemîn billâhi te‘âlâ etmeğin mersûmun bî-vech mu‘ârazadan men‘ birle mâ-vaka‘a bi’t-taleb ketb olundu. Tahrîren fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve sittîn ve elf. Şühûdü’l-hâl: Mustafa Çelebi b. Mehmed el-müezzin, Şaban Reis b. Hüseyin, Hasan Beşe b. Abdullah, Yahya Çelebi b. Nasûh, Osman Beşe b. İbrahim, Mustafa b. Mehmed, Cafer b. Mehmed ve gayruhüm.