Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 224 Hüküm no: 279 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun bt. Kurd’un Beşiktaş’taki bağ ve arsasını Süleyman Bey b. Abdullah’a sattığı Mahrûse-i Galata’ya tâbi‘ kasaba-i Beşiktaş mahallâtından Sinan Paşa-yı Cedîd mahallesi sâkinelerinden Râbia Hatun bt. Kurd tarafından bey‘-i âti’l-beyânı ikrâra vekîl olup Ahmed Çelebi b. Cafer ve Keyvan b. Abdullah şehâdetleri ile şer‘an vekâleti sâbite olan Mustafa Ağa b. Bayram meclis-i şer‘-i hatîr-i lâzımü’t-tevkīrde işbu râfi‘ü’l-kitâb Süleyman Bey b. Abdullah mahzarında bi’l-vekâle ikrâr ve takrîr-i kelâm edüp akd-i âtî sudûruna değin müvekkilem mezbûre Râbia Hatun’un tasarrufunda olup kasaba-i merkūme bağları kurbünde vâki‘ bir tarafdan Hürmüz nâm zimmî bağı ve bir tarafdan Ekmekçi ( ) nâm zimmî bağı ve bir tarafdan Bıçakçı Nikola nâm zimmî bağı ve bir tarafdan müşterî-i mezbûr bağı ile mahdûd tahmînen beş dönüm mikdârı bir kıt‘a bağ ve arz-ı hâliyeyi yirmi altı kıt‘a riyâlî guruşa mezbûr Süleyman Bey’e bey‘-i kat‘î ile bey‘ ve teslîm edüp ol dahi vech-i muharrer üzere iştirâ ve tesellüm eyledikden sonra semeni olan meblağ-ı merkūm yirmi altı guruşu müvekkile-i mezbûre Râbia müşterî-i mezbûrun yedinden ahz eyledi ba‘de’l-yevm zikr olunan bağ ve arz-ı hâliye müşterî-i mezbûr Süleyman Bey’in mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-seneti’l-mezbûre. Şühûdü’l-hâl: Bayram Ağa b. Abdullah, Cafer Ağa b. Ahmed, Ali Çelebi b. el-mezbûr el-müezzin, Mehmed Çelebi b. Şaban, Ebûbekir Beşe b. Atâyi, Yahya Çelebi b. Perviz, Hızır Efendi el-müderris, huddâm.