Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 225 Hüküm no: 280 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tatalya v. Petros ile Klaveris v. Joseph’in satın aldıkları köle bedelinden Ayşe Sultan’a 500 kuruş borçları olduğu Seyyidetü’l-muhadderât iklîletü’l-muhassanât tâcü’l-mestûrât melikiyyetü’l-melekât safiyyetü’s-sıfât refî‘atü’d-derecât zâtü’l-aliyy ve’-sa‘âdât Âişe Sultân bt. el-merhûm ve’l-mağfûr Sultân Ahmed Hân hazretlerinin kethüdâları umdetü’l-emâcid ve’l-ekârim Ahmed Ağa b. Yusuf tarafından ikrâr-ı âti’l-beyâna vekîl olup Mehmed Bey b. Ahmed ve Abdülhalîm Bey b. Ömer şehâdetleri ile şer‘an vekâleti sâbite olan es-Seyyid Mehmed Çelebi b. es-Seyyid Mahmud meclis-i şer‘-i hatîr-i lâzımü’t-tevkīrde mahrûse-i Galata’ya tâbi‘ kasaba-i Beşiktaş’da vâki‘ merhûm Hasan Paşa Zindânı sükkânından Tatalaya v. Pertos ve Klaveris v. Joseph nâm Efrencîler muvâcehelerinde bi’l-vekâle ikrâr ve takrîr-i kelâm edüp müşârun ileyhâ hazretleri mukaddemâ işbu orta boylu açık kaşlı kara elâ gözlü kumral sakallı Efrenciyyü’l-asl Mikal v. Makon nâm abd-i memlûkünü mezbûrâna iştirâkü’s-seviyy üzere beş yüz kıt‘a riyâlî guruş-ı kebîre bey‘-i bâtt-ı sahîh-i şer‘î ile bey‘ ve teslîm eyleyüp onlar dahi abd-i mevsûf-ı mezkûru müşârun ileyhâ Sultân hazretlerinin yedlerinden meblağ-ı mezbûru’n-na‘t beş yüz guruşa iştirâ ve tesellüm eyledikleri ecilden semen-i mezbûr hâlâ müşârun ileyhâya zimmetlerinde lâzımü’l-edâ deynleri olmağın el-hâletü hâzihî takrîrleri tahrîr olunmasın taleb ederim dedikde gıbbe’s-suâl mezbûrân Tatalaya ve Klaveris cevâblarında fi’l-vâki‘ hâl minvâl-i muharrer üzere olup bundan esbak müşârun ileyhâ Âişe Sultân hazretleri abd-i mevsûf-ı mezkûru meblağ-ı mezbûr beş yüz guruşa ale’l-iştirâki’s-seviy bize bâtten bey‘ ve teslîm edüp biz dahi minvâl-i muharrer üzere iştirâ ve tesellüm eylediğimiz ecilden abd-i mezbûrun semeni olan meblağ-ı mezkûr beş yüz guruş elân müşârun ileyhâ Âişe Sultân hazretlerine zimmetimizde lâzımü’l-edâ ve vâcibü’l-kazâ deynimizdir deyü bi tav‘ihimâ ikrâr ve i‘tirâf etdiklerinde vâki‘ hâl hıfzan li’l-mekāl bi’t-taleb ketb olundu. Fi’l-yevmi’s-sâmin aşer min-Zilka‘deti’ş-şerîfe li-seneti’l-mezbûre. Şühûdü’l-hâl: Mehmed Çelebi b. Ebîbekir, İbrahim Bey b. Ahmed Ağa, Receb Çelebi b. Mehmed, Rüstem Bey b. Abdullah, Muharrem Beşe b. Abdullah, Kenan b. Abdullah, Hüdâverdi Beş b. Abdullah, huddâm ve gayruhüm.