Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 225 Hüküm no: 281 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Velisar, İstirati v. Dimo ve Piro v. Yani’nin ortak olarak satın aldıkları köle bedelinden Ayşe Sultan’a 500 kuruş borçları olduğu Seyyidetü’l-muhadderât iklîletü’l-muhassanât tâcü’l-mestûrât refî‘atü’d-derecât Âişe Sultân hazretleri tarafından ikrâr-ı âti’l-beyâna vekîl olup Mehmed Bey b. Ahmed ve Abdülhalîm Bey b. Ömer nâm kimesneler şehâdetleri ile şer‘an vekâleti sâbite olan es-Seyyid Mehmed Çelebi b. Mahmud meclis-i şer‘-i hatîr-i lâzımü’t-tevkīrde mahrûse-i Galata’ya tâbi‘ kasaba-i Beşiktaş’da Sinanpaşa mahallesi sâkinlerinden Panayot v. Velisar ve İstirati v. Dimo ve Piro v. Yani nâm zimmîler muvâcehelerinde bi’l-vekâle ikrâr ve takrîr-i kelâm edüp müşârun ileyhâ hazretleri işbu orta boylu sarışın açık kaşlı göğ elâ gözlü Efrenciyyü’l-asl Dimitri v. İstemad nâm abd-i memlûkünü mezbûrûna iştirâkü’s-seviyy üzere beş yüz kıt‘a riyâlî guruş-ı kebîre bey‘-i bâtt-ı sahîh-i şer‘î ile bey‘ ve teslîm eyleyüp mezbûrûn dahi abd-i mevsûf-ı mezkûru müşârun ileyhâ Sultân hazretlerinin yedlerinden meblağ-ı mezbûru’n-na‘t beş yüz guruşa iştirâ ve tesellüm eyledikleri ecilden semen-i mezbûr hâlâ müşârun-ileyhâya zimmetlerinde lâzımü’l-edâ deynleri olmağın el-hâletü hâzihî takrîrleri tahrîr olunmasın taleb ederim dedikde [83b] gıbbe’s-suâl mezbûrûn Panayot ve İstirati ve Piro cevâblarında fi’l-vâki‘ hâl minvâl-i muharrer üzere olup bundan esbak müşârun ileyhâ Sultân hazretleri abd-i mevsûf-ı mezkûru minvâl-i muharrer üzere meblağ-ı mezbûr beş yüz guruşa ale’l-iştirâki’s-seviy bize bâtten bey‘ ve teslîm edüp biz dahi minvâl-i muharrer üzere iştirâ ve tesellüm eylediğimizden sonra abd-i mevsûf-ı mezbûrun semeni olan meblağ-ı mezbûr beş yüz kıt‘a guruş elân müşârun ileyhâ hazretlerine zimmetimizde lâzımü’l-edâ ve vâcibü’l-kazâ deynimizdir deyü bi-tav‘ihim ikrâr ve i‘tirâf eylediklerinden sonra meblağ-ı mezbûr beş yüz kıt‘a guruşa mahalle-i mezbûre sükkânından Marangoz Yanaki v. Anton nâm zimmî tarafeynden emr ve kabûlü hâviye kefâlet-i sahîha-i şer‘iyye ile kefîl olmağın mâ-vaka‘a bi’t-taleb ketb olundu. Fi’l-yevmi’s-sâmin aşer Zilka‘deti’ş-şerîfe li-seneti’l-mezbûre. Şühûdü’l-hâl: es-Sâbikūn.