Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 226 Hüküm no: 282 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hacı Ahmed’in Bayram Ağa b. Abdullah’ta olan on yedi kuruş alacağının varisleri tarafından tahsil edildiği Mahrûse-i Galata’ya tâbi‘ kasaba-i Beşiktaş’da Sinanpaşa mahallesi sâkinlerinden iken bundan akdem müteveffâ olan el-Hâc Ahmed b. Abdullah nâm kimesnenin verâseti zevcesi Hadice bt. Memi nâm hatun ile sulbî kebîr oğlu Mehmed Çelebi’ye ve sulbî sagīr oğlu İbrahim ve sulbiye sagīre kızı Fâtıma’ya münhasıra olduğu şer‘an zâhir ve mütehakkık oldukdan sonra sagīrân-ı mezbûrânın tesviye-i umûruna kıbel-i şer‘den mansûbe vasîleri ve vâlideleri olan mezbûre Hadice ile merkūm Mehmed Çelebi meclis-i şer‘de Bayram Ağa b. Abdullah mahzarında üzerine herbiri bi’l-asâle ve bi’l-vesâye da‘vâ ve takrîr-i kelâm edüp mûrisimiz müteveffâ-yı mezbûr el-Hâc Ahmed’in mezbûr Bayram Ağa zimmetinde deyn-i şer‘îden yirmi kıt‘a riyâlî guruş hakkı olup meblağ-ı mezbûrdan iki riyâlî guruş mukābelesinde beynlerinde ma‘lûmü’l-vezn iki desti pekmez ve bir riyâlî guruş mukābelesinde bir buçuk keyl nohud alıp bâkī on yedi riyâlî guruşunu kable’l-ahz ve’l-istîfa fevt olmağın meblağ-ı mezbûr bi-hasebi’ş-şer‘î bize ve sagīrân-ı mezbûrâna intikāl etmekle hâlâ asâleten ve vesâyetimiz hasebi ile taleb ederiz suâl olunup alıverilmesi matlûbumuzdur dediklerinde gıbbe’s-suâl merkūm Bayram Ağa cevâbında fi’l-vâki‘ müteveffâ-yı mezbûr el-Hâc Ahmed’in deyn-i şer‘îden zimmetimde lâzımü’l-edâ meblağ-ı merkūm yirmi riyâlî guruş hakkı olup lâkin meblağ-ı mezbûrdan üç guruş mukābelesinde ber-vech-i muharrer ma‘lûmü’l-vezn iki desti pekmez ve bir buçuk keyl nohud ile on bir kıt‘a guruşunu sıhhati hâlinde yedine teslîm edüp bâkī ancak zimmetimde altı guruş hakkı kalmışdır deyü def‘ ile cevâb vericek gıbbe’l-inkâr merkūm Bayram Ağa’dan vech-i muharrer üzere def‘-i mezkûrunu mübeyyin beyyine taleb olundukda ityân-ı beyyineden izhâr-ı acz edüp istihlâf etmeğin müteveffâ-yı mezbûr el-Hâc Ahmed meblağ-ı mezbûr on bir guruşu sıhhati hâlinde merkūm Bayram Ağa’dan kabz eylediği ma‘lûmları olmadığına mezbûrân Hadice ile Mehmed Çelebi’ye yemîn teklîf olundukda onlar dahi alâ-vefkı’l-mes’ûl yemin billâhi’l-azim eylediklerinden sonra mûcibi ile ba‘de’t-tenbîh mezbûrân Mehmed Çelebi ve Hadice Hatun meblağ-ı bâkī on yedi guruşu meclis-i şer‘de Bayram Ağa’nın yedinden her biri asâleten ve vesâyetleri hasebi ile ahz u kabz etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Zilka‘deti’ş-şerîfe li-sene isneyn ve sittîn ve elf. Şühûdü’l-hâl: Mehmed Çelebi b. Şaban, Abdülhalîm Efendi b. Mehmed, Enver Efendi b. Salih, Mustafa Çelebi b. Keyvan, el-Hâc Yusuf b. Abdullah, Ramazan Reis b. Receb, huddâm.