Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 227 Hüküm no: 283 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mahmud’un Rus asıllı cariyesi Kamile’yi azad ettiği Mahrûse-i Galata muzâfâtından kasaba-i Beşiktaş’da Arab İskelesi kurbünde vâki‘ Ahmed Dürrânî Zâviyesi’nde tekye-nişîne olan Emine bt. Mahmud nâm hatun tarafından ikrâr-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân Mustafa Çelebi b. İbrahim ve Mehmed b. Mustafa nâm kimesneler şehâdetleri ile şer‘an vekâleti sâbite olan Mehmed Bey b. Mustafa nâm kimesne meclis-i şer‘-i hatîr-i lâzımü’t-tevkīrde müvekkile-i mezbûre Emine Hatun’un kendi için rıkk-ı sâbıkası mu‘terife olan işbu açık kaşlı göğ elâ gözlü orta boylu Rusiyyetü’l-asl Kâmile bt. Abdullah mahzarında bi’l-vekâle ikrâr ve takrîr-i kelâm edüp müvekkilem mezbûre Emine câriye-i mevsûfe-i mezkûreyi târih-i kitâbdan beş sene mukaddem mülkünden i‘tâk ve tahrîr etmişidi el-hâletü hâzihî mezbûre Kâmile sâir harâir-i asliyyât gibi hürre olup min-ba‘d sâdât için utekā üzerine sâbit olan hakk-ı velâdan gayrı mezbûre Kâmile’nin üzerinde müvekkile-i merkūmenin alâka[sı] kalmamışdır dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-seneti’l-mezbûre. [84a] Şühûdü’l-hâl: Mehmed Çelebi b. Ömer, Yusuf Efendi b. Abdülkerîm, Abdülkerîm Çelebi b. Şaban, Kurd Çelebi b. Hayreddin, Abdülkādir Çelebi b. Mehmed, Mehmed Ağa b. Kurd, Sefer Beşe b. ( ), Mustafa Çelebi b. Abdullah, İbrahim Çelebi b. Mahmud, Ali Beşe b. Mehmed ve gayruhüm.