Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 228 Hüküm no: 284 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mahmud’un bazı eşyalarını azadlı cariyesi Kamile’ye hibe ettiği Mahrûse-i Galata’ya tâbi‘ kasaba-i Beşiktaş’da Arab İskelesi kurbünde vâki‘ Ahmed Dürrânî Zâviyesi’nde tekye-nişîne olan Emine bt. Mahmud nâm hatun tarafından hibe-i âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan Mustafa Çelebi b. İbrahim el-imâm ve Mehmed Çelebi b. Ali nâm kimesneler şehâdetleri ile şer‘an vekâleti sâbite olan Mehmed Bey b. Mustafa meclis-i şer‘-i hatîr-i lâzımü’t-tevkīrde müvekkile-i mezbûrenin câriye-i mu‘tekası işbu râfi‘atü’l-kitâb Kâmile bt. Abdullah mahzarında bi’l-vekâle ikrâr ve takrîr-i kelâm edüp müvekkile-i mezbûre Emine Hatun emlâkinden iki demirli sandık ve bir tahta sandık ve üç beledî döşek ve altı yemeni yorgan ve sekiz minder ve on iki beyaz yasdık ve dört sagīr yasdık ve iki yan keçe ve üç beyaz velense ve bir siyâh velense ve bir neftî Yanbolu kebesi ve bir köhne kırmızı kilim ve bir beyaz kaliçe ve dört tencere ve bir tepsi ve altı ayaklı sahan ve iki yahni tepsisi ve beş sagīr sahan ve üç sagīr güğüm ve iki bakraç ve bir leğen ve bir ibrik ve iki kebîr tâbe ve bir sagīr tâbe ve bir mor darâyî kaftan ve bir entari ve ma‘lûmü’l-vezn bir sîm paftalı kuşak ve üç ayaklı bir çift incili küpesini ve beynlerinde cinsi ve mikdârı ma‘lûm hırdavât-ı hânesini mezbûre Kâmile’ye hibe-i sahîha-i şer‘iyye ile hibe ve teslîm ve temlîk edüp mezbûre Kâmile dahi meclis-i hibede ber-vech-i muharrer ittihâb ve temellük ve kabz ve tesellüm eyledi ba‘de’l-yevm eşyâ-i mezbûre merkūmenin mülk-i mevhûbesidir dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-seneti’l-mezbûre. Şühûdü’l-hâl: es-Sâbikūn.