Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 229 Hüküm no: 286 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Hırsos Kulu’nun Seltane bt. Yani’den elli beş kuruş alacağı olduğu Mahmiye-i Galata muzâfâtından kasaba-i Beşiktaş’a tâbi‘ Arnavud nâm karye sükkânından işbu râfi‘ü’s-sifr Yamandi v. Hırsos Kulu nâm zimmî meclis-i şer‘-i hatîr-i lâzımü’t-tevkīrde yine karye-i merkūme sâkinelerinden Seltane bt. Yani nâm Nasrâniyeyi ihzâr ve muvâcehesinde üzerine da‘vâ ve takrîr-i kelâm edüp bundan akdem mezbûre Seltane’ye elli beş kıt‘a riyâlî guruş ikrâz ve teslîm edüp ol dahi yedimden istikrâz ve kabz eylemişidi hâlâ meblağ-ı mezbûru taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûre Sultane cevâbında müdde‘î-i mezbûrdan ancak kırk beş kıt‘a riyâlî guruş istikrâz ve kabz eyledim deyü mâ‘adâ on kıt‘a riyâlî guruş ziyâdeyi [84b] münkire olmağla müdde‘î-i mezbûrdan ziyâdeyi mübeyyine beyyine taleb olundukda karye-i merkūme sâkinlerinden Piryo ve Yelloha veledey Andreya ve Kanola Reis v. Yani nâm zimmîler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müdde‘î-i mezbûr Yamandi bizim huzurumuzda merkūme Seltane’ye elli beş kıt‘a riyâlî guruş ikrâz, def‘ ve teslîm merkūme Seltane dahi yedinden istikrâz ve kabz eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcibi ile ba‘de’t-tenbîh mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilka‘deti’ş-şerîfe li-sene isneyn ve sittîn ve elf. Şühûdü’l-hâl: Derviş Beşe [b.] Mehmed, Mustafa Beşe b. Mehmed, Cafer b. Mehmed, Mehmed b. Ramazan, Kostantin v. Efendoli, Yani v. Tarandafile, İstirati v. Andon kethüdâ ve gayruhüm.