Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 230 Hüküm no: 287 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum İsmail’in kızları Ümmühani ve Belkıs ile kız kardeşi Rabia’nın ortak köleleri olan Aleksandra v. Andon’u azad ettikleri Mahmiye-i Galata dâhilinde Sultân Bayezid mahallesinde sâkin iken bundan akdem müteveffâ olan İsmail Efendi b. Mustafa’nın verâseti sulbiye kebîre kızları Ümmühânî ve Belkıs nâm hatunlar ile li-ebeveyn kız karındaşı Râbia nâm hatuna münhasıra olduğu şer‘an zâhir ve müte‘ayyin oldukdan sonra mezbûretân Ümmühânî ve Belkıs’ın taraflarından ıtk-ı âti’l-beyânı ikrâra vekîl olup mezbûretânı ma‘rifet-i şer‘iyye ile ârifân olan Mehmed Çelebi b. Mahmud ve Siyavuş Beşe b. Abdullah nâm kimesneler şehâdetleriyle şer‘an vekâleti sâbite olan Mustafa Ağa b. Abdullah nâm kimesne ve mezbûre Râbia tarafından husûs-ı merkūme kezâlik vekîl olup şâhidân-ı mezbûrân şehâdetleriyle şer‘an vekâleti sâbite olan Ali Çelebi b. Yusuf nâm kimesne mahfil-i kazâda müteveffâ-yı merkūm için rıkk-ı sâbıkını mu‘terif olan işbu açık kaşlı göğ elâ gözlü Lehiyyü’l-asl kasru’l-kāme Aleksandra v. Andon muvâcehesinde herbiri bi’l-vekâle ikrâr ve takrîr-i kelâm edüp abd-i mezbûru bundan akdem müvekkilât-ı mezbûrât elli kıt‘a riyâlî guruş üzerine kitâbete kat‘ etmişler idi el-hâletü hâzihî meblağ-ı mezbûru tamâmen merkūmâta edâ ve teslîm etmeğin mezbûr sâir ahrâr-ı asliyyîn gibi olup sâdât için ıtkı üzerinde sâbit olan hakk-ı velâdan gayrı mezbûrun üzerinde alâkaları kalmamışdır dediklerinde gıbbe’t-tasdîki’ş-şer‘î mâ-vaka‘a kayd şüd. Tahrîren fî evâhiri Zilka‘de li-sene isneyn ve sittîn ve elf. Şuhûd: Halim Çelebi el-kâtib, Mehmed Beşe b. Hasan, Ahmed Beşe b. Mehmed, Mehmed b. Ramazan.