Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 230 Hüküm no: 288 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Miho’nun bahçe kirasından Fatma bt. Murad’a 2.611 akçe borcu olduğunu ikrar ettiği Mahrûse-i Galata muzâfâtından kasaba-i Beşiktaş’da Sinanpaşa mahallesi sâkinelerinden zahrü’l-muhadderât Fâtıma Hatun bt. Murad tarafından da‘vâ-yı âtiyetü’l-beyâna vekîl olup mezbûrenin sadrî kebîr oğulları Mustafa Çelebi ve Ahmed Çelebi ibney Şaban şehâdetleri ile şer‘an vekâleti sâbite olan Mehmed Efendi b. Yahya mahfil-i kazâda müvekkile-i merkūmenin mahalle-i mezbûrede vâki‘ ma‘lûmü’l-hudûd mülk bahçesinin müste’ciri olan Andon v. Miho nâm zimmî muvâcehesinde bi’l-vekâle üzerine da‘vâ ve takrîr-i kelâm edüp müvekkile-i mezbûre târih-i kitâb senesi Muharremi gurresinden bir sene tamâmına değin zikr olunan bahçesini mezbûr Andon’a üç [bin] beş yüz akçeye îcâr edüp mezbûr Andon dahi vech-i muharrer üzere istîcâr eyledikden sonra meblağ-ı mezbûrun bin akçesini müvekkile-i mezbûre mersûm Andon yedinden alıp kabz eyleyüp hâlâ akd-i icâre-i mezkûreyi beynlerinde fesh eyledikleri ecilden târih-i kitâba gelince uhdesinde müctemi‘ olan icâre bakiyyesinden iki bin yüz on bir akçe ücret ile sene-i sâbıkada istîcâr eylediği bahçe-i mezkûre ücretinden bâkī beş yüz akçe ki cem‘an iki bin altı yüz on bir akçeyi hâlâ vekâletim hasebi ile taleb ederim suâl olunup meblağeyn-i mezbûreyni alıverilmesi matlûbumdur dedikde gıbbe’s-suâl mezbûr Andon cevâbında fi’l-vâki‘ ber-vech-i muharrer müvekkile-i mezbûre zikr olunan bahçesini târih-i kitâb senesi Muharremi gurresinden bir sene tamâmına değin üç bin beş yüz akçeye bana îcâr eyleyüp ben dahi istîcâr eylediğimden sonra ücret-i mezkûrenin bin akçesini müvekkile-i mezbûreye teslîm edüp hâlâ beynimizde icâre-i mezkûreyi fesh etmekle târih-i kitâba gelince uhdemde müctemi‘ olan icâre bakiyyesinden [85a] iki bin yüz on bir akçe ücret ile sene-i sabıkadan bâkī kalan beş yüz akçe ki cem‘an iki bin altı yüz on bir akçe müvekkile-i mersûmeye zimmetimde lâzımü’l-edâ ve vâcibü’l-kazâ deynimdir deyü bi-tav‘ihî ikrâr ve i‘tirâf etmeğin mûcibi ile ba‘de’t-tenbîh mâ-vaka‘a bi’t-taleb ketb olundu. Fi’l-yevmi’l-ışrîn min-Zilka‘deti’ş-şerîfe li-sene isneteyn ve sittîn ve elf. Şühûdü’l-hâl: Abdülhalîm Efendi [b.] Mehmed, Hızır Efendi el-müderris, huddâm ve gayruhüm.