Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 233 Hüküm no: 293 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Plaş bt. Nikola ile Mitro’nun çocukları Hürmüz, Eline, Angelina ve Zanbolya’nın menzillerini Polhoroni bt. Yanaki’ye sattıkları Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinlerinden iken bundan akdem hâlik olan Mitro v. Nikola nâm zimmînin verâseti zevce-i metrûkesi Plaş bt. Nikola nâm Nasrâniyeye ve sulbî kebîr oğlu Hürmüz nâm zimmî ile sulbiye kebîre kızları Eline ve Angelina ve Zanbolya nâm Nasrâniyelere münhasıra olduğu şer‘an zâhir ve mütehakkık oldukdan sonre mezbûrûn Plaş ve Hürmüz ve Eline ve Angelina ve Zanbolya meclis-i şer‘-i hatîr-i lâzımü’t-tevkīrde işbu râfi‘atü’l-kitâb Polhoroni bt. Yanaki nâm Nasrâniye muvâcehesinde herbiri ikrâr ve takrîr-i kelâm edüp mûrisimiz hâlik-i merkūm Mitro’dan intikāl edüp mahalle-i mezbûrede vâki‘ bir tarafı Tuti v. Alagöz nâm Ermeni mülkü ve bir tarafı mezbûre Eline mülkü ve tarafeyni tarîk-i âm ile mahdûd üç bâb fevkānî odayı ve tahtında bir bâb mahzeni ve bi’r-i mâ’î müştemil mülk-i mevrûs menzilin mezbûr Tuti ile tarîk-i âm tarafında olan iki bâb odayı ve zikr olunan odaların birisinin? tahtında vâki‘ mahzeni ve müstakil bi’r-i mâ’î ve beynimizde vâki‘ müşterek tulumba duvarı ba‘de’l-ifrâz mezbûre Polihoroni’ye on dört bin fıddî râyic [fi’l]-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm eyleyüp ol dahi ber-vech-i muharrer iştirâ ve tesellüm eyledikden sonra semeni olan meblağ-ı merkūm on dört bin akçeyi müşteriye-i mezbûre Polihoroni’nin yedinden bi’t-tamâm ve’l-kemâl ahz u kabz eyledik ba‘de’l-yevm zikr olunan iki bâb fevkānî oda tevâbi‘-i mezkûresiyle merkūmenin mülk-i müşterâsı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Tahrîren fî evâhiri Zilka‘de li-sene isneyn ve sittîn ve elf. [Şühûdü’l-hâl:] Mustafa Ağa b. Hüseyin, Ahmed Çelebi b. İbrahim, Halil Çelebi b. Mehmed, Osman Beşe b. ( ), Yusuf Beşe b. Abdullah, Osman b. Ali, Ahmed Çelebi b. Ali, Hüseyin b. Musa, Mustafa b. Mehmed, Cafer b. Mehmed ve gayruhüm.