Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 234 Hüküm no: 294 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Dimitri tarafından Dedo v. Marko’ya satılan bozahane aletlerinin başkasına ait olduğu iddiasıyla elinden alındığı Mahrûse-i Galata’ya tâbi‘ kasaba-i Tophane’de bozacı tâifesinden Dedo v. Marko nâm zimmî mahfil-i kazâda işbu bâ‘isü’s-sifr Nikola v. Dimitri nâm zimmî muvâcehesinde üzerine da‘vâ ve takrîr-i kelâm edüp târih-i kitâbdan dört sene mukaddem mezbûr Nikola kasaba-i merkūmede vâki‘ taht-ı icâresinde olan bozahâne âlâtından beynimizde adedi ma‘lûm koğa ve çömçe ve tâbe ve değirmen ve şiş ve sini ve hasır ve altı aded fıçının nısf-ı şâyi‘ini kendi mülkü olmak üzere bin dört yüz akçeye bana bey‘ ve kabz-ı semen edüp ben dahi vech-i muharrer üzere iştirâ ve tesellüm eylediğimden sonra eşyâ-yı mezkûreye bundan esbak Tersâne-i Âmire emîni iken müteveffâ olan merhûm İsmail Efendi müstahık olup yedinden almağla hâlâ semen-i merkūma mürâcaat ederim deyicek gıbbe’l-istintâk merkūm Nikola cevâbında zikr olunan eşyânın nısfını kendi mülkü olmak üzere mezbûr Dedo’ya bin dört yüz akçeye bey‘ ve kabz-ı semen eylediğini ikrâr edüp ve lâkin müşârun ileyh İsmail Efendi’nin müstahık olup müdde‘î-i mezbûrun yedinden ba‘de’l-isbât ahz eylediğini inkâr iken [edicek] müdde‘î-i mezbûrdan vech-i meşrûh üzere merkūm Nikola’dan iştirâ eylediği eşyâ-i mezkûreye müşârun ileyh İsmail Efendi müstahık olup ba‘de’l-isbât yedinden [ahz] eylediğine beyyine taleb olundukda ityân-ı beyyine için istimhâl etmekle mehl-i şer‘î ile imhâl olundu mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-seneti’l-mezbûre. Şühûdü’l-hâl: Mustafa Beşe b. Mehmed, Cafer Beşe b. Mehmed, Mehmed b. Ramazan, Ahmed b. Mehmed ve gayruhüm.