Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 234 Hüküm no: 295 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Bali’nin Yahya Efendi Vakfı’ndan aldığı borç Mahrûse-i Galata hâricinde İbrahim Efendi mahallesinde sâkin Mehmed b. Bâli mahfil-i kazâda merhûm sâhibü’l-hayrât ve’l-hasenât Yahya Efendi’nin nükūd-ı mevkūfesine bi’l-fi‘il mütevellî olan Dilaver Ağa b. Abdullah mahzarında ikrâr ve takrîr-i kelâm edüp mahalle-i mezbûrede vâki‘ bir tarafı Mustafa mülkü ve bir tarafı Terzi Hasan mülkü ve bir tarafı Hasan mülkü ve bir tarafı tarîk-i âm ile mahdûd mülk menzilimi cümle-i tevâbi‘ ve levâhıkı ile yüz yirmi beş kıt‘a riyâlî guruşa mütevellî-i mezbûra bi-tarîki’l-istiğlâl bey‘ ve teslîm edüp ol dahi vech-i muharrer üzere mâl-ı vakf-ı mezbûr ile iştirâ ve tesellüm eyleyüp semeni olan meblağ-ı mezbûru yedinden tamâmen ahz u kabz eylediğimden sonra yine mütevellî-i mezbûr menzil-i mezkûru ba‘de’t-tahliyeti’ş-şer‘iyye târih-i kitâbdan sene tamâmına değin on sekiz buçuk kıt‘a guruş ile bir rub‘ bana îcâr ben dahi vech-i muharrer üzere istîcâr eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’l-hâmis min-Zilka‘de li-sene isneyn ve sittîn ve elf. Şühûdü’l-hâl: Mehmed Beşe b. Bahâdır, Ali Yazıcı b. Murad, Ali Efendi b. Mahmud, Halim Çelebi el-kâtib ve gayruhüm.