Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 235 Hüküm no: 296 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülahmer bt. Abdullah’ın Beşiktaş’taki menzilini Mustafa Çelebi b. Şaban Ağa’ya sattığı Mahrûse-i Galata’ya tâbi‘ kasaba-i Beşiktaş’da Sinanpaşa mahallesinde sâkine Gülahmer bt. Abdullah nâm hatun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mustafa Çelebi b. Şaban Ağa mahzarında bi-tav‘ihâ ikrâr-ı tâm ve takrîr-i kelâm edüp akd-i âtî sudûruna değin taht-ı tasarrufumda olup mahalle-i mezbûrede vâki‘ bir tarafı Osman Efendi mülkü ve bir tarafı Kantâr[cı] Mehmed Çelebi mülkü ve bir tarafı Dîvâne Mehmed mülkü ve bir tarafı Küçük Çavuşoğulları bahçesi ile mahdûd iki bâb tahtânî odayı ve bi’r-i mâ’î ve kenîfi ve cüneyneyi ve eşcâr-ı müsmire ve gayr-ı müsmire muhavvatayı müştemil mülk menzilimi merkūm Mustafa Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile on bin nakd-i râyic fi’l-vakt akçeye bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm on bin akçeyi müşterî-i mezbûr Mustafa Çelebi yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan menzil-i mezbûr Mustafa Çelebi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Zilka‘deti’ş-şerîfe li-sene isneteyn ve sittîn ve elf. Şühûdü’l-hâl: Ali Efendi b. Yusuf el-hamîdî, İbrahim Efendi b. Mehmed, Ali Efendi b. Ahmed el-müderris, Abdülhalîm Efendi [b.] Mehmed el-müderris, Hızır Efendi b. Nasûh el-müderris, Ebûbekir Bey b. Ebîbekir, huddâm.