Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 235 Hüküm no: 297 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mustafa Ağa b. Mehmed’e, babasının erkek kardeşi oğlu Mustafa Çelebi’nin mirasçı olamayacağı Mahrûse-i Galata’ya tâbi‘ kasaba-i Beşiktaş’da sâkin iken bundan akdem Mısr-ı Kahire’den gelir iken Vilâyet-i Anadolu’da Karaman Sancağı’na tâbi‘ Ereğli nâm kasabada müteveffâ olan Mustafa Ağa b. Mehmed’in babasının li-ebeveyn er karındaşı oğlu Mustafa Çelebi nâm şâbb-ı emred meclis-i şer‘-i hatîr-i lâzımü’t-tevkīrde müteveffâ-yı mezbûrun babası merkūm Mehmed’in li-ebeveyn karındaşı oğlu ve müteveffâ-yı mezbûrun hasren vârisi ve menzil-i âti’l-beyâna vâzı‘ü’l-yed olan işbu râfi‘ü’l-vesîka İbrahim Çelebi b. Merdan Bey mahzarında üzerine da‘vâ ve takrîr-i kelâm edüp müteveffâ-yı mezbûrun mahalle-i merkūmede vâki‘ bir tarafı Mehmed Bey mülkü ve bir tarafı bazen Ramazan b. Receb mülkü ve bazen tarîk-i hâs ve bir tarafı tarîk-i âm ile mahdûd iki bâb fevkānî oda ve tahtında bir bâb âharı ve bi’r-i mâ’î müştemil menzilinin mecmû‘una mezbûr İbrahim Çelebi vaz‘-ı yed etmişdir menzil-i merkūmdan bana dahi hisse alıverilmek murâdımdır deyicek mezbûr Mustafa Çelebi ber-vech-i muharrer müteveffâ-yı mezbûr Mustafa’ya vâris olmadığı kitâb-ı ferâizde musarrah olmağın bî-vech mu‘ârazadan men‘ birle mâ-vaka‘a bi’t-taleb ketb olundu. Şühûd[ü’l-hal]: Mustafa Çelebi b. Mehmed el-müezzin, Ebûbekir Çelebi b. İbrahim el-müezzin, Süleyman Reis b. Hüseyin, Hasan Beşe b. Abdullah, huddâm ve gayruhüm.