Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 236 Hüküm no: 299 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sarı Ali Kapudan’ın oğulları Mehmed ve Halil’in Efrenç asıllı kölesi Yakomi b. Aleksandra’yı 500 kuruşa Petro v. Yani, Polihoroni v. Mavridi ve Zafira bt. Nikola’ya sattıkları Mahrûse-i Galata’ya tâbi‘ kasaba-i Beşiktaş mahallâtından Sinanpaşa mahallesi sükkânından Petro v. Yani ve Polihoroni v. Mavridi ve zevcesi Zafira bt. Nikola nâm Nasrâniye meclis-i şer‘-i şerîf-i lâzımü’t-tevkīrde sâbıkā Tersâne-i Âmire kethüdâsı olup kasaba-i merkūmede Sinan Paşa-yı Cedîd mahallesinde sâkin iken bundan akdem müteveffâ olan Sarı Ali Kapudan’ın sulbî sagīr oğulları Mehmed ve Halil’in tesviye-i umûrlarına kıbel-i şer‘den mansûbe vasîleri olan vâlideleri Belkıs bt. Abdullah nâm hatun tarafından ikrâr-ı âti’l-beyânı tasdîka vekîl olup mezbûreyi ma‘rifet-i şer‘iyye ile ârifân olan Ali Efendi b. Yusuf ve Ramazan Reis b. Receb nâm kimesneler şehâdetleri ile şer‘an vekâleti sâbite olan zevci Ali Kapudan b. Ahmed mahzarında herbiri ikrâr ve takrîr-i kelâm edüp sagīrân-ı mezbûrânın babaları müteveffâ-yı merkūmdan bi’l-irsi’ş-şer‘î intikāl eden işbu orta boylu açık kaşlı ve iki kaşının fevkinde eser-i cerhi olan sarı elâ gözlü Efrenciyyü’l-asl Yakomi v. Aleksandra nâm abd-i memlûklerini vasiyye-i mezbûre Belkıs Hatun tâmmü’l-vezn sahîhü’l-ayâr beş yüz kıt‘a riyâlî kebîr guruşa bize bey‘ ve teslîm edüp biz dahi minvâl-i muharrer üzere iştirâ ve tesellüm eylediğimiz ecilden semeni olan meblağ-ı mezbûr beş yüz guruş elân vasiyye-i merkūmeye zimmetimizde lâzımü’l-edâ ve vâcibü’l-kazâ deynimizdir dediklerinde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’s-sâlis min-Zilhicceti’ş-şerîfe li-sene isneteyn ve sittîn ve elf. Şühûdü’l-hâl: Ebûbekir Bey b. Ebîbekir, Ali Çelebi b. Cafer Bey el-müezzin, Mehmed Çelebi b. Şaban Ağa, Hızır Efendi b. Nasûh el-müderris, Mustafa Beşe b. Mehmed ve gayruhüm.