Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 237 Hüküm no: 300 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sarı Ali Kapudan’ın oğulları Mehmed ve Halil’in Efrenç asıllı kölesi Berber Miho v. Danyel’i Angilo v. Flandra ve Cayme v. Yorlime’ye 500 kuruşa sattıkları Mahrûse-i Galata hısnı dâhilinde Azabkapısı kurbü sükkânından Angilo v. Flandra ve Cayme v. Yorlime? nâm zimmîler meclis-i şer‘de sâbıkā Tersâne-i Âmire kethüdâsı olan mahrûse-i merkūmeye tâbi‘ kasaba-i Beşiktaş’da Sinan Paşa-yı Cedîd mahallesinde sâkin iken bundan akdem müteveffâ olan Sarı Ali Kapudan’ın salbî sagīr oğulları Mehmed ve Halil’in tesviye-i umûruna kıbel-i şer‘den mansûbe vasîleri olan vâlideleri Belkıs Hatun bt. Abdullah tarafından husûs-ı âti’l-beyânı ikrâra [ve] tasdîka vekîl olup mezbûreyi ma‘rifet-i şer‘iyye ile ârifân olan Ali Efendi ve Ramazan Reis şehâdetleri ile şer‘an vekâleti sâbite olan zevci Ali Kapudan b. Ahmed mahzarında herbiri ikrâr ve takrîr-i kelâm edüp sagīrân-ı mezbûrânın babaları müteveffâ-yı mezbûrdan bi’l-irsi’ş-şer‘î intikāl eden işbu uzun boylu çatık kaşlı kara elâ gözlü Efrenciyyü’l-asl Berber Miho v. Danyel nâm abd-i memlûklerini vasiyye-i mezbûre Belkıs Hatun tâmmü’l-vezn sahîhü’l-ayâr beş yüz kıt‘a riyâlî kebîr guruşa bize bâtten bey‘ ve teslîm edüp biz dahi minvâl-i muharrer üzere iştirâ ve tesellüm eylediğimiz ecilden semeni olan meblağ-ı merkūm beş yüz guruş elân vasiyye-i merkūmeye zimmetimizde lâzımü’l-edâ ve vâcibü’l-kazâ deynimizdir dediklerinde gıbbe’t-tasdîki’ş-şer‘î vicâhen mâ-vaka‘a bi’t-taleb [87a] ketb olundu. Fi’l-yevmi’r-râbi‘ min-şehri Zilhicceti’ş-şerîfe li-sene isneteyn ve sittîn ve elf. Şühûdü’l-hâl: Ahmed Reis b. Mehmed, Ali Beşe b. İbrahim, es-sâbikūn.