Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 238 Hüküm no: 301 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sarı Ali Kapudan’ın oğulları Mehmed ve Halil’in Efrenç asıllı köleleri Mihal v. Kostantin’i Nikola v. Kalamora, Françesko v. Yorgi ve Yani v. Yorani’ye 500 kuruşa sattıkları Mahrûse-i Galata’ya tâbi‘ kasaba-i Beşiktaş’da Sinan Paşa-yı Cedîd mahallesinde vâki‘ Hasan Paşa Zindânı’nda sâkin Nikola v. Kalamora ve Françesko v. Yorgi ve Yani v. Yorani nâm zimmîler meclis-i şer‘de mahalle-i merkūmede sâkin iken bundan akdem müteveffâ olan Sarı Ali Kapudan’ın sulbî sagīr oğulları Mehmed ve Halil’in tesviye-i umûrlarına kıbel-i şer‘den mansûbe vasîleri olan vâlideleri Belkıs Hatun bt. Abdullah tarafından ikrâr-ı âti’l-beyânı tasdîka vekîl olup mezbûreyi ma‘rifet-i şer‘iyye ile ârifân olan Ali Efendi ve Ramazan Reis şehâdetleri ile şer‘an vekâleti sâbite olan zevci Ali Kapudan b. Ahmed mahzarında herbiri ikrâr edüp sagīrân-ı mezbûrânın babaları müteveffâ-yı mezbûrdan bi’l-irsi’ş-şer‘î intikāl eden işbu uzun boylu açık kaşlı koyun elâ gözlü sol kulağı yanında eser-i cerhi olup Efrenciyyü’l-asl Mihal v. Kostantin nâm abd-i memlûklerini vasiyye-i merkūme Belkıs Hatun tâmmü’l-vezn beş yüz kıt‘a riyâlî kebîr guruşa bize bey‘ ve teslîm edüp biz dahi vech-i muharrer üzere iştirâ ve tesellüm eylediğimiz ecilden semeni olan meblalağ-ı merkūm beş yüz guruş elân vasiyye-i merkūmeye zimmetimizde lâzımü’l-edâ ve vâcibü’l-kazâ deynimizdir dediklerinde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’s-sâdis min-Zilhicceti’ş-şerîfe li-seneti’l-mezbûre. Şühûdü’l-hâl: Şaban b. Abdullah, Hasan Beşe b. Abdullah, Abdülkerîm Çelebi b. Ali el-imâm, Enver Efendi b. İslam, es-sâbikūn.