Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 239 Hüküm no: 304 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanola ve Kali’ye ölen anneleri Aksani ile erkek kardeşleri Yako’dan intikal eden menzil hisselerini Avraham v. Yako’ya 760 kuruşa sattıkları Mahrûse-i Kostantıniyye’de Alacahamam kurbünde sâkine iken bundan akdem hâlike olan Aksani bt. Sabetay nâm Yahudiyenin verâseti sadrî kebîr oğlu Yako ile sadriye kebîre kızları Hanola ve Kali evlâd-ı Avraham nâm Yahudilere münhasıra olup kable’l-kısme merkūm Yako dahi hâlik olup verâseti sulbiye kebîre kızı Zanbolye ile kız karındaşları mezbûretân Hanola ve Kali’ye münhasıra olmağla muhallefâtının bi-hükmi’l-münâsaha altı sehimden iki sehmi mezbûre Zanbolye’ye ve ikişer sehmi merkūmetân Hanola ve Kali’ye isâbet eylediği şer‘an zâhir ve mütekarrir oldukdan sonra mezbûretânın taraflarından zikri âtî bey‘ ve kabz-ı semeni ikrâra vekîl olduğu Mehmed Beşe b. Şaban ve Mustafa Efendi b. Halil şehâdetleriyle şer‘an vekâleti sâbite olan Yasef v. Sabetay nâm Yahudi mahfil-i kazâda işbu râfi‘ü’l-kitâb Avraham v. Yako nâm Yahudi muvâcehesinde bi’l-vekâle ikrâr ve takrîr-i kelâm edüp hâlike-i mezbûrenin muhallefâtından müvekkilân-ı mezbûrâna bi-hasebi’l-irsi’ş-şer‘î intikāl eyleyüp mahrûse-i Galata muzâfâtından kasaba-i Beşiktaş’a tâbi‘ Kuruçeşme nâm karyede vâki‘ bir tarafı mezbûr Avraham mülkü ve bir tarafı Yako v. Avraham mülkü ve bir tarafı sâhil-i bahr ve bir tarafı tarîk-i âm ile mahdûd bir tahtânî odayı ve bir mahzeni ve iki bâb fevkānî odayı ve dehlîzi ve tahta-pûşu ve tarîk-i âm üzerinde vâki‘ bir bâb odayı ve limanı ve havluyu müştemil menzilde olan hisse-i merkūmelerini müvekkilât-ı mezbûrât merkūme Avraham tâmmü’l-vezn yedi yüz altmış kıt‘a riyâlî kebîr guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi vech-i muharrer üzere iştirâ ve tesellüm eyledikden sonra semeni olan meblağ-ı mezbûru yedi yüz [altmış riyâlî guruşu] bi’t-tamâm ve’l-kemâl ahz u kabz eylediler ba‘de’l-yevm menzil-i mezkûr merkūmun mülk-i müşterâsı olmuşdur keyfe mâ yeşâ ve yehtâr mutasarrıf dedikde gıbbe’t-tasdîki’ş-şer‘î mâ-vaka‘a kayd şüd. Tahrîren fi’l-yevmi’s-sâmin min-Zilhicceti’ş-şerîfe li-sene isneyn ve sittîn ve elf. Şühûdü’l-hâl: Musa Çelebi b. Mehmed, İsmail b. Hasan, Ali Beşe b. Ferhad, Hasan b. Ömer Beşe, Kara Mehmed b. Abdurrahman, Cafer b. Mehmed, Mehmed b. Ramazan ve gayruhüm mine’l-huzzâr.