Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 242 Hüküm no: 308 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Ali’nin kiracısı Receb b. Muharrem aleyhine açtığı ecr-i misl davasından vazgeçtiği Mahrûse-i Galata’ya tâbi‘ kasaba-i Beşiktaş mahallâtında sâkine fahrü’l-muhadderât Hadice Hânım bt. Ali tarafından ikrâr-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Mehmed b. Ramazan ve Kara Mehmed b. Abdullah nâm kimesneler şehâdetleri ile şer‘an vekâleti sâbite olan Havvâ bt. Mehmed nâm hatun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Receb b. Muharrem nâm kimesne mahzarında bi’l-vekâle ikrâr ve takrîr-i kelâm edüp mezbûr Receb bin elli bir senesi Muharremi gurresinden târih-i kitâba gelince on bir sene müvekkilem mezbûre Hadice Hanım’ın mahalle-i merkūmede vâki‘ ma‘lûmü’l-hudûd menzilinde işbu hâzıra bi’l-meclis olan zevce-i mutallakası Hadice bt. Ahmed nâm hatun ile bilâ-ücret ma‘an sâkin olmağla müvekkile-i merkūme dahi bundan akdem menzil-i mezbûrun ecr-i mislini merkūm Receb’den da‘vâ sadedinde olmuşidi el-hâletü hâzihî müvekkile-i mezbûre da‘vâ-yı merkūmesinden fâriğa olup zikr olunan menzilinin ecr-i misli da‘vâsına müte‘allik cemî‘-i da‘vâ ve mütâlebâtdan mezbûr Receb’in zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim min-ba‘d husûs-ı merkūma müte‘allik vechen mine’l-vücûh da‘vâ ve nizâ‘ım kalmadı dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilhicceti’ş-şerîfe li-sene isneteyn ve sittîn ve elf. Şuhûd: es-Sâbikūn.