Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 242 Hüküm no: 309 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskili v. Yorgi’nin Manol v. Velos’dan yedi yüz on akçe alacağı olduğu Mahrûse-i Galata’ya tâbi‘ kasaba-i Beşiktaş’da Sinanpaşa mahallesinde sâkin işbu râfi‘ü’s-sifr İskili v. Yorgi nâm zimmî meclis-i şer‘-i hatîr-i lâzımü’t-tevkīrde kasaba-i merkūmede sâkin Manol v. Velos nâm zimmî muvâcehesinde üzerine da‘vâ ve takrîr-i kelâm edüp cihet-i deyn-i şer‘îden mezbûrun zimmetinde olan fıddî râyicü’l-[fi’l]-vakt yedi yüz on akçe hakkımı mezbûrdan da‘vâ ve taleb eylediğimde meblağ-ı mezbûru bana edâdan imtinâ‘ etmeğin hâlâ taleb ederim suâl olunsun meblağ-ı mezbûrun alıverilmesi matlûbumdur dedikde gıbbe’s-suâl merkūm Manol cevâbında fi’l-vâki‘ müdde‘î-i mezbûra cihet-i merkūmdan yedi yüz on akçe deynim vardır deyü bi-tav‘ihî ikrâr ve i‘tirâf etmekle meblağ-ı mezbûru müdde‘î-i merkūma edâya mezbûr Manol’a tenbîh birle mâ-vaka‘a bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-seneti’l-mezbûre. Şühûdü’l-hâl: Mehmed b. Abdullah, Muslı b. Abdullah [b.] Mahmud, Mustafa b. Mehmed, huddâm ve gayruhüm.