Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 243 Hüküm no: 310 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum İbrahim Çavuş b. Abdullah’ın muhallefatını elinde bulunduran Ahmed Ağa, diğer Ahmed Ağa ve Rabia aleyhine diğer varislerin dava açtıkları Vilâyet-i Rumeli’nde Semendire Sancağı’na tâbi‘ bi’l-fi‘il Osati [Osat] kādısı olan umdetü’l-kuzât Mevlânâ Receb Efendi b. Musa kıbelinden imzâsıyla mümzâ ve hatemi ile mahtûm ve târih-i kitâb senesi Şevvâli’nin sekizinci günü târihiyle müverrah nakl-i şer‘î ve hitâb-ı hükmî vârid oldukda mazmûn-ı münîfinden kazâ-i mezbûra tâbi‘ Poştanin nâm karyeden Âişe bt. Abdullah nâm hatun ile Hüseyin ve İbrahim ve Âmine ve Sâkine evlâd-ı Süleyman’dan vech-i âtî üzere da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra kazâ-i mezbûr muzâfâtından Sokol Kal‘ası ihtiyârlarından Hüsrev b. Abdurrahman b. Abdullah ve Hüseyin b. Ali b. Memi nâm kimesneler nakl ve tahrîr için mahall-i harc ve ta‘dîle li-ecli’ş-şehâde hâzırân olup şöyle edâ-i şehâdet-i şer‘iyye eylediler ki fi’l-asl karye-i mezbûre sâkinlerinden olup mahrûse-i Galata’ya tâbi‘ kasaba-i Beşiktaş’da Sinanpaşa mahallesinde sâkin iken bundan akdem müteveffâ olup muhallefâtı mahalle-i mezbûrede sâkine zevce-i metrûkesi Râbia bt. Abdullah nâm hatun ile ammi Ahmed Ağa b. Abdüssamed ve li-ebeveyn er karındaşı oğlu diğer Ahmed Ağa b. Süleyman yedlerinde mazbût olan İbrahim Çavuş b. Abdullah’ın verâseti li-ebeveyn kız karındaşı mezbûre Âişe’ye ve li-ebeveyn er karındaşı oğulları mezbûrûn Ahmed ve Hüseyin ve İbrahim ve li-ebeveyn er karındaşı kızları Âmine ve Sâkine ile mezbûre Râbia’ya münhasıradır müteveffâ-yı mezbûrun merkūmûndan gayrı vârisi olmadığı ma‘lûmumuzdur mezbûrûn için muhallefâtına vâzı‘ü’l-yed olanlardan hak taleb ve ahz vardır biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye etdiklerinde ba‘de ri‘âyeti şerâiti’l-kabûl şehâdetleri makbûle oldukdan sonra mezbûrûn Hüseyin ve İbrahim ve Âişe ve Sâkine ve Âmine muhallefât-ı müteveffâ-yı mezbûrdan isâbet eden hisse-i şer‘iyyeleriyle vâzı‘ü’l-yed olan mezbûrûn Ahmed Ağa ve diğer Ahmed Ağa ve Râbia’dan lede’l-hükkâmi’l-kirâm da‘vâ ve talebe ve ahz u kabza ve kendilere îsâle ve kabzını îsâl[in] mütevakkıf olduğu umûrun cümlesine hâmilü hâze’l-kitâb Hasan Bey b. İdris nâm cündiyi taraflarından vekîl ve nâib-i menâb nasb ü ta‘yîn etdiklerinde ol dahi vekâlet-i mezbûreyi kabul ve hizmet-i lâzımesin edâya ta‘ahhüd eylediği münderic olmağla nakl-i mezbûr merkūmân Ahmed Ağa ve Râbia Hatun muvâcehelerinde feth ü kırâ’et olundukda isre’l-istintâk mezbûrân Ahmed Ağa ve Râbia Hatun nakl-i merkūmun müşârun ileyh Receb Efendi tarafından vürûdunu münkirler olıcak udûl-i Müslimînden olup zeyl-i nakilde mastûru’l-esâmî olan şuhûd-ı tarîkden Süleyman b. Ali ve Abdi b. Yusuf nâm kimesneler li-ecli’ş-şehâde hâzırân bi’l-meclis olup istişhâd olunduklarında fi’l-vâki‘ kitâb-ı merkūm mevlânâ-yı mezbûr Receb Efendi kıbelinden vârid olup bizim muvâcehemizde kırâ’et eyleyüp ba‘dehû imzâlayıp ve hatemleyip imzâ ve hatemine bizi işhâd eyledi kitâb-ı merkūmun zeylinde hat ve zahrında hatem mevlânâ-yı mezbûrun hat ve hatemidir biz bu husûsa şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra mûcibi ile ba‘de’l-hükm vekîl-i mezbûr meclis-i şer‘de muhallefât-ı müteveffâ-yı mezbûrdan on iki bin nakd-i râyic fi’l-vakt akçe ile bir alaca kilim ve iki müsta‘mel münakkaş makrame ve bir sırmalı tor kîse ve bir gömlek ve iki don ve bir müsta‘mel tülbent ve bir münakkaş uçkur ve iki müsta‘mel beyaz bogasi sâde ve bir beyaz velense ve bir sîm gaddâre ve bir sahan ve bir tencere ve bir tâbe ve bir nühâs pûsus [pusis] ve dört zirâ‘ meres, iki Londra çuka ve bir sîm balta ve bir çatma yorganı mezbûrân Ahmed Ağa ve Râbia Hatun yedlerinden alıp kabz ve tesellüm eyledikden sonra yine iâde-i kelâm edüp eşyâ-i merkūmeden mâ‘adâ muhallefât-ı müteveffâ-yı mezbûrdan hâric ez-defter-i kassâm on bin nakid akçe ile bir re’s âl tonlu bârgir ve bir sîm raht ve bir sîm reşme ve mükemmel eğer ve neftî müsta‘mel kaftan ve bir siyâh kanca ve bir şîr kürk kaplı kontoş ve iki beyaz velense ve bir kadife kavuk ve bir tülbent ve bir bogasi çintiyun [çintiyan] ve bir çift iskarlet ve bez çakşırı ve bir kırmızı ihrâm ve bir siyâh yapunca ve bir leğen ve bir ibrik ve bir kahve ibriği ve bir kırmızı kilim ve bir sîm devâd ve bir sîm bıçak ve bir çakmaklı tüfenk ki [89a] cem‘an bu zikr olunan eşyâdan dahi müvekkillerime isâbet eden hisse-i şer‘iyyelerin hâlâ taleb ederim dedikde gıbbe’l-istintâk mezbûrân Ahmed Ağa ve Râbia cevâblarında vekîl-i merkūmu da‘vâ eyledik eşyâda müteveffâ-yı mezbûrun li-ebeveyn er karındaşı oğlu olan gāib ani’l-meclis mezbûr diğer Ahmed Ağa ahz eyledi bizim hisselerimiz [i‘tâ] olmamışdır dediklerinde vekîl-i merkūmeden eşyâ-i mezkûreyi dahi mezbûrân ahz eyledikde beyyine taleb olundukda ityân-ı beyyineden izhâr-ı acz edüp istihlâf etmeğin gıbbe’t-tahlîfi’ş-şer‘î mâ-vaka‘a bi’t-taleb ketb olundu. Tahrîren fî evâhiri Zilhicce li-sene isneteyn ve sittîn ve elf. Şühûdü’l-hâl: Abdullah Efendi el-kâtib, Ahmed Ağa b. Mehmed, Zekeriya Efendi, Mustafa Beşe b. Mehmed, Cafer b. Mehmed ve gayruhüm.