Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 244 Hüküm no: 311 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogosna bt. Dimitri’nin merhum Mehmed Çelebi b. Ahmed’den kırk kuruş borç aldığına yemin ettiği Mahrûse-i Galata’ya tâbi‘ kasaba-i Beşiktaş muzâfâtından Arnavudköyü demekle ma‘rûf nâm karye sükkânından iken bundan akdem müteveffâ olan Mehmed Çelebi b. Ahmed’in evlâd-ı sıgārına kıbel-i şer‘den mansûbe vasîleri olan vâlideleri Bâdyeldân bt. Abdullah nâm hatun tarafından da‘vâ-yı âtîye vekîl olan es-Seyyid Ali Çelebi b. es-Seyyid Abdülkādir meclis-i şer‘-i hatîr-i lâzımü’t-tevkīrde karye-i mezbûre sâkinelerinden Bagosna bt. Dimitri nâm Nasrâniye muvâcehesinde üzerine bi’l-vekâle da‘vâ ve takrîr-i kelâm edüp müteveffâ-yı mezbûr Mehmed Çelebi sıhhati hâlinde merkūme Bagosna[‘ya] yetmiş kıt‘a riyâlî guruş-ı kebîr ikrâz ve teslîm eyledi ol dahi vech-i muharrer üzere müteveffâ-yı merkūmun yedinden istikrâz ve ahz u kabz ve tesellüm eyledikden sonra kable’l-istîfâ fevt olmağla hâlâ meblağ-ı mezbûru vekâletim hasebiyle taleb ederim suâl olunup alıverilmesi murâdımdır dedikde gıbbe’s-suâl mezbûre Bagosna cevâbında merkūm Mehmed Çelebi’den sıhhati hâlinde ancak kırk kıt‘a riyâlî guruş istikrâz ve kabz ve tesellüm eylediğin ikrâr edüp ziyâde olan otuz guruşu inkâr etmekle vekîl-i mezbûrdan ziyâdeyi mübeyyine beyyine taleb olundukda ol dahi ityân-ı beyyineden izhâr-ı kemâl-i acz edüp istihlâf etmeğin müteveffâ-yı mezbûrdan meblağ-ı merkūm kırk guruşdan ziyâde ahz u kabz etmediğine yemin teklîf olundukda ol dahi alâ-vefkı’l-mes’ûl yemîn billâhi’llezî enzele’l-İncîle alâ İsa aleyhisselâm etmeğin mâ-vaka‘a bi’t-taleb ketb olundu, tahrîr olundu. Tahrîren fi’l-yevmi’s-sâdis min-Zilhicceti’ş-şerîfe li-sene isneyn ve sittîn ve elf. Şühûdü’l-hâl: Hızır Efendi el-kâtib, Mustafa Beşe [b.] Mehmed, Cafer b. Mehmed, Mehmed b. Ramazan ve gayruhüm.