Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 245 Hüküm no: 313 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Perkop v. Kiryazi’nin evinin bir kısmını ayırıp damadı Yanaki v. Aslan’a hibe ettiği Mahmiye-i Galata muzâfâtından kasaba-i Beşiktaş’da Sinanpaşa mahallesi sâkinlerinden Perkop v. Kiryazi nâm zimmî meclis-i şer‘-i hatîr-i lâzımü’t-tevkīrde damadı işbu râfi‘ü’s-sifr Yanaki v. Aslan nâm zimmî muvâcehesinde ikrâr ve takrîr-i kelâm edüp mahalle-i mezbûrede vâki‘ bir tarafı Palalogaoğlu mülkü ve bir tarafı kendi mülküm ve bir tarafı Yamandi mülkü ve bir tarafı tarîk-i âm ile mahdûd bir bâb şehnişînli fevkānî odayı ve tahtında mahzeni ve iki bâb tahtânî odayı ve cüneyneyi müştemil mülk menzilimin mezbûr Palalogaoğlu tarafında vâki‘ zikr olunan bir bâb şehnişînli odayı ve tahtında mahzeni menzil-i mezbûrdan ifrâz ve alâmet-i fâsıla vaz‘ eylediğimden sonra damadım merkūm Yanaki’ye ba‘de’t-tahliye hibe-i sahîha-i şer‘iyye ile hibe ve temlîk ve teslîm eyleyüp ol dahi müfrez-i mezkûru meclis-i hibede ittihâb ve kabz ve temellük ve tesellüm edüp hibe-i mezkûre mukābelesinde işbu meclis-i şer‘de mevcûd olan elli miskāl bir tek burma altın bileziğini bana ivaz vermeğin ben dahi zikr olunan bileziği mezbûrun yedinden ber-vech-i muharrer alıp kabz ve kabûl eyledim ba‘de’l-yevm zikr olunan oda ve mahzen merkūm Yanaki’nin mülk-i mevhûbu olmuşdur dedikde gıbbe’t-tasdîki’ş-şer‘î vicâhen ve şifâhen mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-seneti’l-mezbûre. Şühûdü’l-hâl: Mehmed Ağa b. Ali el-cündi, Mehmed b. Ahmed, Ahmed Bey b. Mehmed el-cündi, Hızır Efendi el-müderris, huddâm.