Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 246 Hüküm no: 314 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Perkop v. Kiryazi’nin evinin bir kısmını ayırıp kızı Maryora’ya hibe ettiği Mahmiye-i Galata muzâfâtından kasaba-i Beşiktaş’da Sinanpaşa mahallesinde sâkin Perkop v. Kiryazi nâm zimmî meclis-i şer‘-i hatîr-i lâzımü’t-tevkīrde sulbiye kebîre kızı işbu râfi‘atü’s-sifr Maryora nâm Nasrâniye tarafından hibe-i âtiyetü’l-beyânı tasdîka vekîl olup bi-mâ hüve nehcü’s-sübût şer‘an vekâleti sâbite olan Anastaş v. Nikola nâm zimmî muvâcehesinde ikrâr ve takrîr-i kelâm edüp mahalle-i mezbûrede vâki‘ bir tarafı Palaloga nâm zimmî mülkü ve bir tarafı Yamandi nâm zimmî mülkü ve bir tarafı kendi mülküm ve bir tarafı tarîk-i âm ile mahdûd bir bâb şehnişînli odayı ve tahtında mahzeni ve iki bâb tahtânî odayı ve cüneyneyi müştemil mülk menzilimin mezbûr Palaloga tarafında vâki‘ zikr olunan bir bâb şehnişînli odayı ve tahtında mahzeni bundan akdem ba‘de’l-ifrâz damadım işbu hâzır bi’l-meclis Yanaki v. Aslan nâm zimmîye hibe-i sahîha-i şer‘iyye ile hibe ve temlîk ve teslîm eylediğimden sonra merkūm Yamandi tarafından vâki‘ zikr olunan iki bâb tahtânî odaları ve cüneyne-i müfrez-i âharı dahi kızım müvekkile-i mezbûre Maryora’ya ba‘de’t-tahliye hibe-i sahîha-i şer‘iyye ile hibe ve temlîk ve teslîm edüp ol dahi meclis-i hibede ittihâb ve temellük ve tesellüm eyledi ba‘de’l-yevm zikr olunan iki bâb tahtânî odalar ve cüneyne kızım müvekkile-i merkūmenin mülk-i mevhûbudur keyfe mâ teşâ ve tehtâr mutasarrıfe olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’r-râbi aşer min-Zilhicceti’ş-şerîfe li-sene isneteyn ve sittîn ve elf. Şühûdü’l-hâl: es-Sâbikūn.