Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 247 Hüküm no: 315 Orijinal metin no: [89b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Receb’in evine girip hamayilini çalan Şaban b. Ahmed’i yakalayıp suçunu şahitlerle ispat ettiği Mahmiye-i Galata’ya tabi kasaba-i Beşiktaş’da Sinanpaşa mahallesinde sâkin işbu râfi‘ü’l-vesîka Mehmed Beşe b. Receb nâm kimesne meclis-i şer‘-i hatîr-i lâzımü’t-tevkīrde Şaban b. Ahmed nâm kimesne mahzarında üzerine da‘vâ ve takrîr-i kelâm edüp mezbûr Şaban târih-i kitâb günü kabîl-i zuhrda mahalle-i merkūmede vâki‘ makarr-ı nisvânım olan menzilimin hâriciyesinde olan odama girip beş tâne sîm düğmeli Paris çuka kaplı hamâyili hufyeten aldıkda mezbûru ahz eyledim suâl olunup ihkāk-ı hak olunması matlûbumdur dedikde gıbbe’s-suâl ve’l-inkâr müdde‘î-i mezbûrdan da‘vâsına mutâbık beyyine taleb olundukda udûl-i Müslimînden ve sikāt-i muvahhidîn[den] Murad b. el-Hâc Mehmed ve Mustafa b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâdi’ş-şer‘î fi’l-vâki‘ mezbûr Şaban târih-i kitâb günü kabîl-i zuhrda müdde‘î-i mezbûrun menziline varup hâriciyesinde vâki‘ odasından zikri sebk eden iki mücelled Paris çuka gılâflı hamâyilini hufyeten aldıkda mezbûru ahz eyledi biz bu husûsa şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe li-sene isneyn ve sittîn ve elf. Şühûdü’l-hâl: Mahmud b. Mustafa, Ali b. Zülfikâr, Seydi Ahmed b. İbrahim, Halil b. Mustafa, huddâm.