Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 247 Hüküm no: 316 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Keyvan’ın fıçı tahtası bedelinden Petro v. Yani’den bin dokuz yüz akçe alacağı olduğu Mahmiye-i Galata muzâfâtından kasaba-i Beşiktaş’da sâkin işbu râfi‘ü’l-kitâb Mustafa Çelebi b. Keyvan nâm yesârî mahfil-i kazâda kasaba-i mezbûre sâkinlerinden Petro v. Yani nâm zimmî muvâcehesinde üzerine da‘vâ ve takrîr-i kelâm edüp mezbûr Petro’nun zimmetinde adedi ma‘lûm fıçı tahtası bahâsından üç bin dokuz [yüz] akçe hakkım olup alıverilmesi matlûbumdur dedikde gıbbe’s-suâl mezbûr Petro cevâbında müdde‘î-i merkūma adedi ma‘lûm fıçı tahtası bahâsından zimmetinde üç bin dokuz yüz akçe deyni olduğunu ikrâr ve i‘tirâf etdikden sonra mezbûr Petro’nun zevcesi Zafira bt. Yorgi nâm Nasrâniye târih-i kitâbdan otuz gün tamâmına değin meblağ-ı mezbûru müdde‘î-i merkūma edâya tarafeynden emr ve kabûlü hâviye kefâlet-i sahîha-i şer‘iyye ile kefîl bi’l-mâl oldukda Nasrâniyye-i mezbûrenin hîn-i mütâlebede nefsine ve gaybet ederse mâlına mahalle-i Sinan Paşa’da Kürkçüoğlu demekle ma‘rûf Yorgi v. Dimitri nâm zimmî dahi tarafeynden emr ve kabûlü hâviye kefâlet-i sahîha-i şer‘iyye ile kefîl olmağın mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene isneteyn ve sittîn ve elf. Şühûdü’l-hâl: Mustafa Çelebi b. İbrahim el-imâm, Hızır Efendi el-müderris, Abdülhalîm Efendi el-müderris, huddâm.