Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 248 Hüküm no: 318 Orijinal metin no: [90a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri’nin ölen İstefani v. İstefani’nin vârislerine elmas bedelinden otuz kuruş borcu olduğunu ikrar ettiği Mahmiye-i Galata hâricinde Tomtom mahallesinde sâkin iken bundan akdem hâlik olan İstefani v. İstefani nâm zimmînin verâseti zevce-i metrûkesi Karnita bt. Corye nâm Nasrâniye ile sulbiye sagīre kızları Saroga ve Maryola’ya münhasıra idüği şer‘an zâhir ve mütehakkık oldukdan sonra sagīretân-ı mezbûretânın tesviye-i umûrlarına kıbel-i şer‘den mansûbe vasîleri olan vâlideleri mezbûre Karnita tarafından husûs-ı âti’l-beyânı da‘vâ ve talebe ve ahz u kabz ve kendüye îsâle vekîl olup Pasko v. Tomaraki ve Dimitraki v. Kostantin nâm zimmîler şehâdetleri ile şer‘an vekâleti sâbite olan Hastaki v. Tomaraki nâm zimmî meclis-i şer‘-i hatîr-i lâzımü’t-tevkīrde mahmiye-i mezbûra tâbi‘ kasaba-i Beşiktaş muzâfâtından Ortaköy nâm karye sâkinlerinden Dimitri v. ( ) nâm zimmî muvâcehesinde bi’l-vekâle üzerine da‘vâ ve takrîr-i kelâm edüp hâlik-i mezbûr İstefani sıhhati hâlinde mezbûr Dimitri’ye bey‘ etmek için bir elmas taşlı altın hâtemini def‘ ve teslîm edüp ol dahi ber-vech-i muharrer yedinden alıp kabz eyledikden sonra zikr olunan hâtemi Kerçe nâm zimmîye otuz kıt‘a riyâlî guruşa bey‘ ve kabz-ı semen eyledikde kable’l-îfâ mezbûr İstefani mürd olmağla semen-i mezkûr müvekkile-i merkūme ile sagīretân-ı mezbûretâna intikāl etmekle hâlâ vekâlet-i mahkiyem hasebi ile taleb ederim suâl olunup alıverilmesi matlûbumdur dedikde gıbbe’s-suâl mezbûr Dimitri cevâbında fi’l-vâki‘ hâlik-i mezbûrdan sıhhati hâlinde zikr olunan hâtemi bey‘ etmek için alıp kabz eylediğimden sonra merkūm Kerçe’ye otuz kıt‘a riyâlî guruşa bey‘ ve kabz-ı semen eyledim meblağ-ı mezbûr otuz guruş hâlik-i mezbûrun veresesine elân zimmetimde lâzımü’l-edâ ve vâcibü’l-kazâ deynimdir deyü ikrâr ve i‘tirâf etmeğin edâya tenbîh birle mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Zilhicceti’ş-şerîfe li-sene isneteyn ve sittîn ve elf. Şühûdü’l-hâl: Abdülhalîm Efendi el-müderris, Hızır Efendi el-müderris, Mustafa Beşe b. Mehmed, Cafer b. Mehmed ve gayruhüm.