Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 249 Hüküm no: 320 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Muharrem’in karısını üç talak ile boşaması için Hüseyin Ağa’yı vekil tayin etmediğine yemin ettiği Bu hücceti kâtib sehven kayd etmeğin battâla çekilip sahîhi zeyline kayd olmuşdur. << Mahrûse-i Galata tevâbi‘inden kasaba-i Beşiktaş’da Sinanpaşa mahallesinde sâkine Neslihân bt. Abdullah nâm hatun mahfil-i kazâda mukaddemâ zevci olan işbu râfi‘ü’l-kitâb Receb b. Muharrem mahzarında üzerine da‘vâ ve takrîr-i kelâm edüp mezbûr Receb’in zevce-i menkûhası iken beni talâk-i selâse ile tatlîk eylemeğe işbu hâzır bi’l-meclis olan Hüseyin Ağa b. Mehmed Bey’i tarafından vekîl ve nâib-i menâb nasb ü ta‘yîn eyledikde mezbûr Hüseyin Ağa dahi ba‘de’l-kabûl ber-vech-i muharrer talâk-ı selâse ile beni tatlîk etmeğin hâlâ mezbûr Receb’in zimmetinde ma‘kūdün-aleyh olan bin yüz akçe mehr-i mü’eccelimi ve nafaka-i iddet-i mu‘ayyene ve me’ûnet-i süknâmı taleb ederim suâl olunup alıverilmesi matlûbumdur dedikde gıbbe’s-suâl mezbûr Receb cevâbında fi’l-vâki‘ mezbûre Neslihân Hatun bundan akdem zevce-i menkûham idi lâkin mezbûrenin zimmetimde mütekarrir olan bin yüz akçe mehr-i mü’ecceli ve nafaka-i iddeti ve me’ûnet-i süknâsı üzerine muhâla‘aya mezbûr Hüseyin Ağa’yı tevkîl etmişidim deyü talâk-ı selâse ile tevkîlini münkir olıcak müdde‘iye-i mezbûreden da‘vâsını mübeyyine beyyine taleb olundukda ityân-ı beyyineden izhâr-ı acz edüp istihlâf etmeğin müdde‘iye-i mezbûreyi vech-i meşrûh üzere talâk-ı selâse ile tatlîk etmeğe merkūm Hüseyin Ağa’yı tarafından tevkîl etmediğine merkūm Receb’e yemîn teklîf olundukda ol dahi alâ-vechi’l-mes’ûl yemîn billâhi’l-azîm etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Zilhicceti’ş-şerîfe li-sene isneyn ve sittîn. Şühûdü’l-hâl: Fahrü’l-müderrisîn Abülhalîm Efendi b. Mehmed, Hızır Efendi el-müderris, Mustafa Beşe b. Mehmed, Mehmed b. Ramazan, huddâm, gayruhüm.>>