Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 250 Hüküm no: 321 Orijinal metin no: [90b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan bt. Abdullah’ın kendisini boşamak için kocası Receb b. Muharrem’in Hüseyin Ağa’yı vekil tayin ettiğine dair iddiasını ispat edemediği Mahrûse-i Galata tevâbi‘inden kasaba-i Beşiktaş’da Sinanpaşa mahallesinde sâkine Neslihân bt. Abdullah nâm hatun mahfil-i kazâda zevci işbu râfi‘ü’l-kitâb Receb b. Muharrem mahzarında üzerine da‘vâ ve takrîr-i kelâm edüp bundan akdem mezbûr Receb talâk-i selâse ile tatlîk eylemeğe gāib ani’l-meclis Hüseyin Ağa b. Mehmed Bey’i tarafından vekîl ve nâib-i menâb nasb ü ta‘yîn eyledikde gāib-i mezbûr Hüseyin Ağa dahi ba‘de’l-kabûl ber-vech-i muharrer talâk-ı selâse ile beni tatlîk etmeğin hâlâ merkūm Receb benim ile izdivâc mu‘âmelesin murâd eder suâl olunup mûcibi icrâ olmak taleb ederim dedikde gıbbe’s-suâl merkūm Receb husûs-ı mezbûru bi’l-külliye münkir olıcak mezbûre Neslihân’dan takrîrine mutâbık beyyine taleb olundukda ityân-ı beyyineden izhâr-ı acz edüp istihlâf etmeğin müdde‘iye-i mezbûreyi vech-i meşrûh üzere talâk-i selâse ile tatlîk etmeğin gāib-i mezbûr Hüseyin Ağa’yı tarafından tevkîl etmediğine merkūm Receb’e yemîn teklîf olundukda ol dahi alâ-vechi’l-mes’ûl yemîn billâhi’l-azîm etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Zilhicceti’ş-şerîfe li-sene isneyn ve sittîn. Şühûdü’l-hâl: Abülhalîm Efendi b. Mehmed, Hızır Efendi el-müderris, Mustafa Beşe b. Mehmed, Cafer b. Mehmed, huddâm ve gayruhüm.