Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 251 Hüküm no: 322 Orijinal metin no: [90b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülahmer bt. Abdullah’ın Rus asıllı cariyesi Gonca ile bazı eşyalarını Mustafa Çelebi b. Şaban’a hibe ettiği Husûs-ı âti’l-beyânın mahallinde tahrîri iltimâs olmağın küttâb-ı mahkemeden Mevlânâ Hızır Efendi irsâl olunup ol dahi zeyl-i kitâbda mastûru’l-esâmî olan Müslimîn ile mahrûse-i Galata’ya tâbi‘ kasaba-i Beşiktaş’da Sinan Paşa-yı Cedîd mahallesinde vâki‘ merhûm Şaban Ağa’nın menziline varup akd-i meclis-i şer‘ eyledikde menzil-i merkūmda sâkine Gülahmer bt. Abdullah nâm hatun meclis-i merkūmda işbu râfi‘ü’l-kitâb Mustafa Çelebi b. Şaban mahzarında ikrâr ve takrîr-i kelâm edüp silk-i mülkümde münselik olup işbu açık kaşlı göğ elâ gözlü sarışın Rusiyyetü’l-asl Gonca bt. Abdullah nâm sagīre câriye-i memlûkemi ve iki döşek ve bir minder ve beş aded yasdık ve iki yan keçesi ve iki tencere ve bir yahni tepsisi ve bir büyük tepsi ve sâir beynimizde ma‘lûmü’l-cins ism-i mâl ıtlâk olunur cümle eşyâmı mersûm Mustafa Çelebi’ye hibe-i sahîha-i şer‘iyye ile hibe ve temlîk ve teslîm edüp [91a] ol dahi meclis-i hibede ittihâb ve temellük ve tesellüm eyledi ba‘de’l-yevm zikr olunan câriye ile eşyâ-i merkūme mersûm Mustafa Çelebi’nin mülk-i mevhûbudur keyfe mâ yeşâ ve yehtâr mutasarrıf olsun dedikde mukırre-i mezbûrenin vech-i meşrûh üzere cârî olan ikrârını mersûm Mustafa Çelebi bi’l-müvâcehe tasdîk etdiğini mevlânâ-yı mezbûr mahallinde tahrîr ba‘dehû gelip meclis-i şer‘de alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe li-sene isneteyn ve sittîn ve elf min hicreti men lehü’l-izzü ve’ş-şeref. Şühûdü’l-hâl: Enver Efendi b. İslam, Ali Efendi b. Yusuf, Ali Çelebi b. Cafer, Ali Beşe b. Abdullah, Sinan b. Abdullah, Mustafa b. Mehmed ve gayruhüm.