Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 251 Hüküm no: 323 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fındıklı kasabası ekmekçilerinden Mustafa Beşe b. Abdullah’ın Beşiktaş’ta ekmek satmasına müdahale edilemeyeceği Mahrûse-i Galata hârici kasaba-i Fındıklı’da ekmekçi tâifesinden işbu râfi‘ü’l-kitâb Mustafa Beşe b. Abdullah mahfil-i kazâda takrîr-i kelâm ve bast ani’l-merâm edüp kadîmü’l-eyyâmdan bu ana gelince kasaba-i merkūmede vâki‘ ekmekçi fırınında tabh olunan ekmekden kasaba-i Beşiktaş’da vaz‘ olunan iskemlede ekmek bey‘ edegelmiş iken hâlâ zikr olunan kasaba-i Beşiktaş ekmekçileri hilâf-ı âdet mu‘ârazadan hâlî olmadığı ecilden hakīkat-i hâl işbu hâzırûn bi’l-meclis olan müslimînden istihbâr olunup takrîrleri tahrîr olunması murâdımdır dedikde zikr olunan kasaba-i Beşiktaş ahâlîsinden Hasan Çelebi b. Muharrem ve Ali Çelebi b. Ahmed ve Ahmed Kapudan b. Ali ve Mehmed Ağa b. Seyfullah ve Ali Çelebi b. Seyfi ve Hüdâverdi Beşe b. İbrahim ve Mahmud Beşe b. Mehmed ve Mustafa b. Ali ve Ömer Çelebi b. Süleyman ve sâirleri bi-ecma‘ihim meclis-i şer‘a hâzırûn olup isre’l-istihbâr fi’l-vâki‘ kadîmü’l-eyyâmdan bu ana gelince zikr olunan kasaba-i Fındıklı’da vâki‘ ekmekçi fırınında tabh olunan ekmekden zikri sebk eden kasaba-i Beşiktaş sûkunda vaz‘ olunan iskemlede dahi ekmek bey‘ olunagelmişdir deyü herbiri haber verdiklerinde vâki‘ hâl hıfzan li’l-mekāl bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilhicceti’ş-şerîfe li-seneti’l-mezbûre. Şühûdü’l-hâl: Abdülhalîm Çelebi b. Mehmed, Hızır Efendi el-müderris, Mustafa Beşe b. Mehmed, Cafer b. Mehmed, Mehmed b. Ramazan ve gayruhüm.