Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 252 Hüküm no: 324 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs bt. İsmail ile Rabia bt. Mustafa’nın Mehmed Çelebi’den istiğlâl yoluyla borç aldıkları Mahmiye-i Galata dâhilinde Sultân Bayezid mahallesinde sâkin iken bundan akdem müteveffâ olan İsmail Efendi b. Mustafa’nın verâseti sulbiye kebîre kızları Belkıs ve Ümmühânî nâm hatunlar ile li-ebeveyn kız karındaşı Râbia nâm hatuna münhasıra olduğu şer‘an zâhir ve mütehakkık oldukdan sonra mezbûre Belkıs tarafından ikrâr-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Siyavuş b. Abdullah ve Mehmed Çelebi b. Mahmud nâm kimesneler şehâdetleri ile şer‘an vekâleti sâbite olan Mustafa Çavuş b. ( ) nâm kimesne ile mezbûre Râbia tarafından dahi ikrâr-ı âti’l-beyâna vekîl olup kezâlik şâhidân-ı mezbûrân şehâdetleri ile şer‘an vekâleti sâbite olan Ali Çelebi b. Yusuf nâm kimesne meclis-i şer‘de her biri bi’l-vekâle ikrâr ve takrîr-i kelâm edüp müvekkiletân-ı mezbûretân Belkıs ve Râbia mahmiye-i mezkûre muzâfâtından kasaba-i Beşiktaş’a tâbi‘ Maçuka mahallesinde vâki‘ bir tarafı Küçük Çavuş mülkü ve bir tarafı el-Hâc Kasım mülkü ve bir tarafı vâdi ve bir tarafı tarîk-i âm ile mahdûd merkūmetânın hisselerine ta‘yîn olunup [mülk-i] mevrûsları olan mülk bahçeyi mezbûr Mehmed Çelebi’ye iki yük fıddî râyic [fi’l]-vakt akçeye bi-tarîki’l-istiğlâl bey‘ ve teslîm edüp ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûru müvekkiletân-ı merkūmetân mezbûr Mehmed Çelebi Bey yedinden tamâmen ahz u kabz eylediklerinden sonra yine bahçe-i mezkûreyi mezbûr Mehmed Çelebi müvekkiletân-ı merkūmetâna târih-i kitâbdan sene tamâmına değin otuz bin akçeye îcâr edüp onlar dahi istîcâr eylediler dediklerinde gıbbe’t-tasdîki’ş-şer‘î mâ-vaka‘a kayd şüd. Tahrîren fî evâhiri Zilhicce li-sene isneyn ve sittîn ve elf. Şühûdü’l-hâl: Veli Bey b. Abdülmümin, Abdullah Çelebi b. ( ), Mehmed Kapudan b. Mahmud, Mustafa b. Mehmed, Hızır b. Mehmed ve gayruhüm.