Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 253 Hüküm no: 325 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Abdullah’ın Arnavutköyü’ndeki bağını Piri Beşe b. Murad’a sattığı Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karye sâkinlerinden Süleyman Bey b. Abdullah mahfil-i kazâda işbu râfi‘ü’l-kitâb Pîrî Beşe b. Murad mahzarında ikrâr ve takrîr-i kelâm edüp kasaba-i merkūme[ye] tâbi‘ Arnavudköyü nâm karye bağları kurbünde vâki‘ bir [tarafı] Manolaki bağı ve bir tarafı Azador bağı ve iki tarafı tarîk-i âm ile mahdûd bir dönüm mikdârı bağımı târih-i kitâbdan sekiz sene mukaddem bin altı yüz râyic [fi’l]-vakt akçeye mezbûr Pîrî’ye bey‘-i kat‘î ile bey‘ ve teslîm-i mebî‘ eyleyüp semeni olan meblağ-ı merkūmu mezbûrun yedinden ahz u kabz etmişidim el-hâletü hâzihî bağ-ı mahdûd-ı mezkûr merkūm Pîri Beşe’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Zilhicceti’ş-şerîfe li-sene isneteyn ve sittîn ve elf. Şühûdü’l-hâl: Mustafa Efendi b. Halil el-imâm, İsmail Beşe b. Hasan, Süleyman Beşe b. Hasan, Mehmed Beşe b. Abdullah, Ömer b. Hüseyin, Musa Çelebi b. ( ), huddâm.