Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 254 Hüküm no: 329 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Hacı Mahmud’un Kasap Ahmed Beşe b. Şaban ile Todori v. İstirati’den 8.400 akçe alacağı olduğu İşbu râfi‘ü’l-kitâb İbrahim Çelebi b. el-Hâc Mahmud nâm kimesne meclis-i şer‘-i hatîr-i lâzımü’t-tevkīrde mahmiye-i Galata muzâfâtından kasaba-i Beşiktaş’da sâkin kasab tâifesinden Ahmed Beşe b. Şaban nâm kimesneyi ve Todori v. İstirati nâm zimmîyi ihzâr ve muvâcehesinde üzerine da‘vâ ve takrîr-i kelâm edüp bundan esbak mezbûr Ahmed Beşe ile merkūm Todori ma‘an sermâye için benden herbiri on yedi bin beş yüz râyic [fi’l]-vakt fıddî akçe istidâne edüp ben dahi meblağ-ı merkūm on yedi bin beş yüz akçeyi mezbûr Ahmed Beşe ile merkūm Todori yedlerine def‘ ve teslîm edüp onlar dahi yedimden ahz eylediklerinden sonra dokuz bin yüz akçesini yedlerinden ahz eyleyüp sekiz bin dört yüz akçe hakkım zimmetlerinde bâkī kalmışdır hâlâ mezbûrlardan suâl olunup alıverilmesi murâdımdır dedikde gıbbe’s-suâl mezbûr Ahmed Beşe ile merkūm Todori cevâblarında fi’l-vâki‘ minvâl-i meşrûh üzere mezbûr İbrahim Çelebi’den meblağ-ı merkūm on yedi bin beş yüz akçe ahz eyleyüp dokuz bin yüz akçesini edâ ve teslîm edüp sekiz bin dört yüz akçe hakkı zimmetimizde bâkīdir deyü herbiri ikrâr ve i‘tirâf etmeğin gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene selâse ve sittîn ve elf. Şühûdü’l-hâl: Yahya Çelebi b. Nasûh, Kadri Çelebi b. Mehmed, Hızır Efendi el-müderris, huddâm.