Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 255 Hüküm no: 330 Orijinal metin no: [92a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mayer v. Yako’nun Kuruçeşme köyündeki bağını Piri b. Abdullah’a dört bin akçeye sattığı Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karye sâkinlerinden Mayer v. Yako nâm Yahudi meclis-i şer‘-i hatîr-i lâzımü’t-tevkīrde işbu râfi‘ü’l-kitâb Pîrî b. Abdullah mahzarında ikrâr ve takrîr-i kelâm edüp karye-i merkūme bağları kurbünde vâki‘ bir tarafdan Aslan nâm Ermeni bağı ve bir tarafdan Sivastos nâm Ermeni bağı ve bir tarafdan Garabit nâm Ermeni bağı ve taraf-ı râbi‘i tarîk-i âm ile mahdûd tahmînen üç dönüm mikdârı bağımı mezbûr Pîrî’ye tarafeynden îcâb ve kabûlü hâvî bey‘-i kat‘î ile dört bin nak-i râyic [fi’l]-vakt fıddî akçeye [92b] bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm dört bin akçeyi mezbûr Piri Beşe yedinden ahz eyledim ba‘de’l-yevm zikr olunan bağ müşterî-i mezbûr Piri Beşe’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm li-sene selâse ve sittîn ve elf. Şühûdü’l-hâl: Mustafa Efendi el-imâm, Mehmed Beşe b. Şaban, İsmail Beşe b. Hasan, Süleyman Beşe b. Abdullah, Mehmed Beşe b. Abdullah, Ömer b. Hüseyin ve gayruhüm mine’l-hâzırîn.