Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 255 Hüküm no: 331 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Simaven’in arsasını Nikos v. Avanos’a yüz yetmiş kuruşa sattığı Dârü’s-saltanati’s-seniyye mahrûse-i İstanbul’da Gedikpaşa mahallesinde sâkin Kirkor v. Simaven nâm Ermeni meclis-i şer‘-i hatîr-i lâzımü’t-tevkīrde işbu râfi‘ü’s-sifr Nikos v. Avanos nâm Ermeni muvâcehesinde ikrâr ve takrîr-i kelâm edüp kasaba-i Beşiktaş’a tâbi‘ Ortaköy nâm karye bağları kurbünde vâki‘ iki tarafdan kendi bağım ve bir tarafdan müşterî-i mezbûr Nikos bağı ve bir tarafdan tarîk-i âm ile mahdûd tûlen kırk sekiz zirâ‘ ve arzen kırk iki zirâ‘ arz-ı hâliyemi mezbûr Nikos’a tarafeynden îcâb ve kabûlü hâvî bey‘-i kat‘î ile yüz yetmiş kıt‘a riyâlî guruşa bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm yüz yetmiş kıt‘a riyâlî guruşa mezbûrun yedinden ahz u kabz eyledim ba‘de’l-yevm zikr olunan merkūmun mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm li-seneti’l-mezbûre. Şühûdü’l-hâl: Arslan Beşe b. Hasan, Mehmed Beşe b. Hasan, Receb Beşe b. Ahmed, Mustafa Çelebi b. Mustafa el-hammâmî, huddâm ve gayruhüm.