Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 256 Hüküm no: 332 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Mehmed’in arsasını Yusuf b. Abdullah iki bin iki yüz akçeye sattığı Mahrûse-i Galata muzâfâtından kasaba-i Beşiktaş’da Yahya Efendi mahallesi sâkinlerinden İbrahim Efendi b. Mehmed mahfil-i kazâda işbu râfi‘ü[-kitâb] Yusuf b. Abdullah mahzarında ikrâr ve takrîr-i kelâm edüp Sultân Bayezid Hân Evkāfı’ndan olup beher sene altı akçe mukāta‘a ile akd-i âtî sudûruna değin taht-ı tasarrufumda olup mahalle-i mezbûrede vâki‘ bir tarafdan Fâik mülkü ve bir tarafdan Hasan mülkü ve bir tarafdan Ali mülkü ve bir tarafdan tarîk-i hâs ile mahdûd tûlen on beş zirâ‘ ve arzen on zirâ‘ arsa-i hâliyemi mezbûr Yusuf iki bin iki yüz nakd-i râyic [fi’l]-vakt fıddî [Osmanîye] bâtten bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm iki bin iki yüz akçeyi mezbûrun yedinden ahz eyledim ba‘de’l-yevm zikr olunan arsa-i hâliye mezbûr Yusuf’un mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fî-evâili Muharremi’l-harâm li-sene selâse ve sittîn ve elf. Şühûdü’l-hâl: Mehmed Efendi b. Zülfikâr el-imâm, Ali Beşe b. Mustafa, Hüseyin Beşe b. Abdullah, Hasan Çelebi b. Muharrem, Muharrem Bey b. Abdullah, huddâm.